Улууска аан бастаан тэриллибит куонкурус үөрэх тиһигин саҥа таһымҥа таһаарар кыахтаах кэскиллээх салайааччылары өйөөһүҥҥэ ананна.
Кыттааччылар үөрэх салайыытын уобаластарыгар дириҥ билиини эрэ буолбакка, бастыҥ технологиялары олоххо киллэрэргэ, үөрэнээччилэр уонна учууталлар сайдалларыгар сөптөөх эйгэни үөскэтэргэ сатабылларын көрдөрдүлэр.
Күн устата дириэктэрдэр кэккэ уустук уонна интэриэһинэй тургутууну аастылар:
1 түһүмэх «Профессиональный уровень». Куонкурус дириэктэри теоретическэй бэлэмнээһин сыанатыттан саҕаланна. Манна кыттааччылар профессиональнай эйгэҕэ билиилэрин тургутар тестирование толордулар.
Тэрээһин үөрүүлээх аһыллыытыгар кыттаччылары үөрэх салалтатын салайааччыта Борис Васильев дириэктэр аныгы усулуобуйаҕа идэтин суолтатын тоһоҕолоон бэлиэтээтэ.
2 түһүмэх «Формула успеха». Хас биирдии дириэктэр үөрэх тэрилтэтин салайар ураты уопутун, ситиһиилэрин, инновацияларын уонна стратегияларын билиһиннэрдэ. 3 «Стратегическое решение» түһүмэххэ үөрэх тиһигин иннигэр тирээн турар суолталаах кыһалҕаларга стратегическай быһаарыы оҥорулунна.
Тыҥааһыннаах үлэ кэнниттэн, күн иккис аҥарыгар, 4 түһүмэх буолла. Бу түһүмэх чэрчитинэн кыттааччылар үөрүйэхтэрин маастар-кылааска көрдөрдүлэр. Түмүктүүр 5 «Пресс-конференция» түһүмэххэ дириэктэрдэр уопуттаах экспертэр ыйытыыларыгар хоруйдаатылар, сүрүн кыһалҕалары дьүүллэстилэр уонна бэйэлэрин тэрилтэлэрин сайыннарарга былааннарын үллэһиннилэр.
Дьүүллүүр сүбэ састаабыгар киирдилэр: үөрэх салалтатын салайааччыта Борис Васильев, солбуйааччы Владимир Уаров, үөрэх профсоюһун бэрэссэдээтэлэ Нина Павлова, үөрэх салалтатын информационнай-методическай отдел сүрүннүүр исписэлииһэ Маргарита Попова, Сунтаардааҕы гимназия дириэктэрэ, өрөспүүбүлүкэтээҕи «Директор года — 2024» лауреата Любовь Евсеева, Сунтаардааҕы политехническай лиссиэй дириэктэрэ Олег Сосин, үөрэҕирии бэтэрээнэ Борис Герасимов.
Ол курдук, I улуустааҕы «Директор года — 2025» куонкурус кыайыылааҕынан буолла Г.Е. Бессонов аатынан Тойбохой орто оскуолатын дириэктэрэ Айаал Валерьевич Тотонов.
Ону таһынан, анал ааттар иҥэрилиннилэр: «Директор-мотиватор» анал аат — Туойдаах оскуолатын дириэктэригэр Юлия Юрьевна Анисимоваҕа, «Директор-менеджер» — И.Г. Спиридонов Кириэстээх политехническай оскуола дириэктэригэр Евгений Борисович Тараяровка, «Директор-лидер» Хоро орто оскуолатын дириэктэригэр Мария Николаевна Софронееваҕа.
«Лучшая управленческая команда» анал аат Хоро орто оскуолатын кэллэктиибигэр туттарылынна.
Үөрэх салалтата «Директор года» куонкурус үтүө үгэскэ кубулуйан, үөрэх тиһигин сайыннарыыга көҕүлээн, ыытылла туруоҕа диэн эрэнэр.
