Куонкурус иккис күнүгэр кэтэхтэн «Төрөппүттэргэ сэминээр» уонна «Профессиональнай кэпсэтии» ток-шоу түһүмэхтэр буоллулар. Кыттааччылар оскуола иннинээҕи үөрэхтээһин тирээн турар боппуруостарыгар дьүүллэстилэр, уопуттарын үллэһиннилэр уонна үөрэх тиһигин сайыннарыыга бэйэлэрин тус этиилэрин киллэрдилэр.
Ол кэннэ куонкурус үөрүүлээх сиэрэ-туома ыытылынна. Жюри кыайыылаахтар ааттарын билиһиннэрэн, анал өйдөбүнньүк бириистэринэн уонна дипломунан наҕараадалаата. Ол курдук, 3 истиэпэннээх диплом ананна Күүкэй сэлиэнньэтин «Биһик» уһуйаан иитээччитигэр Виктория Александровна Прокопьеваҕа. 2 истиэпэннээх диплом — Сунтаар 4 нүөмэрдээх «Березка» уһуйаан иитээччитигэр Антонина Анатольевна Колесоваҕа, 1 истиэпэннээх диплом — Сунтаар 5 нүөмэрдээх «Ньургуһун» уһуйаан эбии үөрэхтээһин педагогар Игнат Александрович Федоровка.
«СЫЛ БАСТЫҤ ИИТЭЭЧЧИТЭ — 2025» куонкурус муҥутуур кыайыылаҕынан таҕыста Сунтаар 11 нүөмэрдээх «Кыталык» оҕо сайдар киинин эбии үөрэхтээһин педагога Диана Афанасьевна Корнилова.
Кыттааччылары ис сүрэхтэн эҕэрдэлиибит, Диана Афанасьевнаҕа улууһун аатын өрөспүүбүлүкэтээҕи күрэххэ көмүскүү барарыгар ситиһиини, кыайыыга дьулууру баҕарабыт!
Улуустааҕы куонкурус Сунтаар улууһун оскуола иннинээҕи үөрэхтээһинин ситимигэр сүҥкэн суолталаах түгэн, бастыҥ педагогтары көҕүлээһиҥҥэ, уопут атастаһарга уонна сайдыы суолларын торумнуурга көдьүүстээх былаһаакка буолла.
