Олунньу 24-28 күннэригэр Казань куоракка Сунтаар улууһуттан 20 оҕо баран ОГЭ-ҕа математика предметигэр эбии дьарыктаннылар (Уһун Күөл-1, Бүлүүчээн-2, Кутана-1, Күүкэй-1, Куокуну-1, Түбэй-5, СПТЛ-И-3, Устье-1, Элгээйи-2, Тойбохой-2, ССОШ 2-1).
Олунньу 22 күнүгэр 20 оҕо уонна 2 салайааччы Сунтаартан Миирнэйгэ дылы автобуһунан тиийэн, онтон Москва куоракка самолетунан көттүлэр. Сорох оҕолор Москваҕа бастакытын тиийбит буолан Кыһыл болуоссаты саҥа көрдүлэр, куорат устун күүлэйдээтилэр. Онтон сарсыныгар Москва-Казань поеһынан айаннаан үөрэниэхтээх сирдэригэр тиийдилэр.
Бастакы күҥҥэ оҕолорбутугар анаан Казань куорат устун автобуһунан гидтаах обзорнай экскурсия оҥордулар, куорат биллэр сирдэрин кэрийдилэр, хаартыскаҕа түстүлэр. Сарсыныгар оскуолаҕа үрдүк категориялаах учууталлар математикаҕа эрчийдилэр, маастар-кылаастары көрдөрдүлэр. Ол кэннэ үс күн Казанскай федеральнай университекка күүстээх эрчиллиилэр буоллулар.
Бүтэһик күҥҥэ КФУ устун экскурсия, практическай үлэлэр, музейга сылдьыы буолла. Казань куорат учууталлара уонна олохтоохторо оҕолорбут элбэҕи билэ-көрө сатыылларын, бэйэлэрин баҕаларынан билии ыла кэлбиттэрин, активнайдарын, куруук үөрэ-көтө көрсөллөрүн, олус бэрээдэктээхтэрин дэлби хайҕаатылар.
Оҕолор дэлби астынан, билиибит өссө эбилиннэ, элбэх доҕоттордоннубут диэн, киэҥ сири көрөн үөрэн-көтөн кэллилэр.
Төрөппүттэр Сунтаар улууһун үөрэҕин салалтатын салайааччытыгар Борис Николаевичка, солбуйааччыларыгар Елена Дмитриевнаҕа, Владимир Владимировичка, айан устата бэйэлэрин оҕолорун курдук көрөн-истэн, бүөбэйдээн, үөрэтэн-такайан илдьэ сылдьыбыт салайааччыларга Наталья Афанасьевнаҕа, Мария Павловнаҕа улахан махталбытын биллэрэбит, өссө да маннык проектар буола турдуннар, оҕолорбут билиилэрэ эбиллэн, кругозордара кэҥээн астынан дуоһуйан кэллилэр диэн махтал тылларын тиэрдэллэр.
