Муус устар 4 күнүгэр С.А. Зверев аатынан Түбэй-Дьаархан оскуолатыгар научнай-практическай конференция ситиһиилээхтик буолан ааста. Манна барыта 280 киһи кыттыыны ылбыта бэлиэтэнэр: үөрэнээччилэр, оскуола дириэктэрдэрэ, учууталлар, педагог-библиотекардар, эбии үөрэхтээһин уһуйааччылара, уһуйаан үлэһиттэрэ, оскуола, нэһилиэк түмэллэрин үлэһиттэрэ уонна төрөппүттэр.
Конференцияны Саха Республикатын үөрэҕирии уонна билим министиэристибэтэ, Сунтаар улууһун үөрэҕин салалтата, Сунтаар улууһун култууратын уонна айылгытын салалтата, С.А. Зверев-Кыыл Уола аатынан Сунтаардааҕы түмэл ситимэ, С.А. Зверев аатынан Түбэй-Дьаархан орто оскуолата, “Түбэй-Дьаархан нэһилиэгэ” муниципальнай тэриллии бииргэ үлэлэһэн тэрийэн ыыттылар.
Сергей Афанасьевич Зверев – ССРС Суруйааччыларын Союһун чилиэнэ (1939), норуот уус-уран айымньытын, остуоруйатын нөҥүө дириҥ суолун хаалларбыт култуура сырдатааччыта этэ. Конференция сүрүн сыала саха ускуустубатын үгэстэрин тарҕатыыга, үүнэр көлүөнэ билиитин хаҥатарга аналлаах буолла.
Бу күн аһыллыытын сиэрэ-туома олус истиҥник, сэргэхтик ыытылынна. Сергей Зверев төрөппүт оҕолоро Варвара Иванова (Зверева), Төгүл Зверев аҕаларын саха норуотун култууратыгар кылаатын бэлиэтээн, иһирэх тылларын эттилэр.
Конференция бырагырааммата С. А. Зверев нэһилиэстибэтин араас аспектарын дьүүллэһиигэ биэс секциянан ыытылынна. Кыттааччылар Сергей Афанасьевич олоҕун уонна айымньытын кытта ситимнээн бэйэлэрин чинчийиилэринэн, булумньуларынан үллэһиннилэр. Саҥа идеялары, ньымалары киллэрбит эдэр чинчийээччилэр этиилэрэ ордук кэрэхсэбилли ылла. Ону тэҥэ С.А. Зверев айымньыларынан оңоһуллубут куукула, кэтэхтэн уруһуй күрэҕэ, онлайн-викторина буоллулар. Ону таһынан, бырагыраамма чэрчитинэн ыраахтан-чугастан кэлбит ыалдьыттар Сергей Афанасьевич олоҕун, айымньытын кытта сибээстээх түмэли сэргии-махтайа көрдүлэр.
Күн иккис аҥарыгар пленарнай мунньах ыытылынна. Манна М.К. Аммосов аатынан ХИФУ профессора, филологическай наука доктора Василий Илларионов, культурология кафедратын сэбиэдиссэйэ, филологическай наука доктора Людмила Ефимова, культурология наукатын кандидата Саргылана Никифорова уонна ХИФУ культурология институтун студеннара бэйэлэрин чинчийиилэрин билиһиннэрдилэр.
Сергей Афанасьевич Зверев кэриэһигэр ыытыллыбыт тэрээһин саха култууратыгар кини кылаатын дириҥэтиигэ эрэ буолбакка, искусствоҕа интэриэһи үөскэтэргэ ситиһиилээх былаһаакка буолла.
Тэрээһин үөрүүлээх сабыллыытыгар тэрийээччилэр кыттааччылары маннык дьоһуннаах тиэмэлэргэ дьүүллэһиигэ кыттыыларын иһин махталларын биллэрдилэр. Ону тэҥэ кэлэр көлүөнэлэргэ культурнай нэһилиэстибэни харыстааһын суолтатын бэлиэтээтилэр. Бу курдук конференция маннык бииргэ үлэлээһиннэр наадалаахтарын бигэргэттэ.
