Муус устар 9-10 күннэригэр Саха Өрөспүүбүлүкэтин оҕолорун уопсастыбаннай холбоһуктарын сойууһа, “Сахамедиа” өрөспүүбүлүкэтээҕи информационнай-издательскай холдинг, Үөһээ Бүлүүтээҕи «Тускул» оҕо айымньытын киинэ, улуустааҕы “Сомоҕо” оҕо хамсааһына, Исидор Никифорович Барахов аатынан Саха Өрөспүүбүлүкэтин судаарыстыбаннаһын түмэлэ V-төгүлүн “БАСХАН-2025” өрөспүүбүлүкэтээҕи (дьыалабыай оонньуу) күрэһин уһулуччулаах судаарыстыбаннай диэйэтэл Гавриил Иосифович Чиряев 100 сылыгар анаан Өрөспүүбүлүкэтээҕи “Сахамедиа” холдинг киинигэр үрдүк тэрээһиннээхтик ыыттылар.
Күрэс сыалынан — уол оҕону киэҥ эйгэҕэ таһаарыы, билиһиннэрии, уол оҕо, эр киһи оруолун үрдэтии, дириҥ өйдөбүллээх, киэҥ билиилээх, ырааҕы ыраҥалыыр киэҥ толкуйдаах ис санаатын, толкуйун аһаҕастык сахалыы сайа этиниитин ситиһии, төрөөбүт дойдуга, ийэ сиргэ үтүө сыһыаҥҥа иитии буолар.
Күрэскэ икки күн устата уопсайа 12 улуустан 20 кыттааччы күөн көрсөн өйдөрүн-санааларын, киэҥ билиилэрин-көрүүлэрин тургутан көрдүлэр. Уопсайа биэс түһүмэхтээх ыытылынна: «Удьуор утума», «Өркөн өй», «Дойду салайааччыта — мин тус көрүүбүнэн», «Мөккүөр», «Айыы умсулҕана». Ол курдук, «Удьуор утума» — бу түһүмэххэ кыттааччы удьуор утумун, төрүттэрин төһө ыраах көлүөнэҕэ диэри билэрэ-көрөрө сыаналанна, «Дойду салайааччылара мин харахпынан» түһүмэххэ араас кэмнэргэ олорон ааспыт дойду биллэр салайааччыларын, кинилэр норуот сайдыытыгар үлэлээбит үлэлэрин, ыыппыт политикаларын ыраҥалаатылар, «Өркөн өй» – быстах, тутатына өйү эрчийэр, буккуйар 5 ыйытыкка хоруйдаатылар, «Мөккүөр» (Дебат) түһүмэххэ кыттааччылар “Тыа хаһаайыстыбатыгар ыччаты сыһыарыы: төрүт дьарыгы тутан хааларбыт сайдыыга тиэрдиэ дуо?” тиэмэ тула кэпсэттилэр, санаа атастастылар, мөккүстүлэр уонна түмүктүүр түһүмэх «Айыы умсулҕана» – талан ылбыт хоһоону тутатына салҕыы айан, сыанаҕа доргуччу ааҕан иһитиннэрдилэр.
Уолаттар бу биэс түһүмэх тургутууларын барытын этэҥҥэ ааһаннар күрэс түмүгүнэн кыайыылаахтар ааттаннылар. Биhиги оскуолабытыттан «Өркөн өй БАСХАНА»- Сергеев Дамир Александрович, 10 кылаас үөрэнээччитэ буолла! О5обутугар ессе да урдук ситиhиилэри ба5арабыт! Салайааччылар: Степанова А.Н. омук тылын учуутала, о5о саас сирдьитэ, Кириллина К. Г.история уонна обществознание учуутала, педагог-организатор.
