Бүгүн, ыам ыйын 6 күнүгэр 2025 сылга Дойдубутугар Аҕа дойдуну көмүскээччи, Сахабыт сиригэр Ийэ дойдуну көмүскээччи сылларын чэрчитинэн, Улуу Кыайыы 80 сылыгар анаммыт «Саллааттар омоон суолларынан» диэн ааттаах Бордоҥ орто оскуолатын көҕүлээһининэн «Сүүрүү эстафетата» сүрдээх тэрээһиннээхтик ыытылынна.
Ол курдук, Сунтаар улууһуттан сэрии буолбутугар 700 эр бэртэрэ, дьон чулуулара талыллан, бастакы хомуурга түбэһэн, 1941 сыллаахха балаҕан ыйын 5 күнүгэр «Сунтаар-Турукта» суолунан туос сатыы туруммуттара. Ол кэмҥэ Бүлүү уута уолан, борокуот сылдьыбат этэ. Ол иһин Ленскэй Туруктатыгар диэри, 24 көһү (240км) сатыы хааман барбыттара.
Бүгүҥҥү тэрээһиммит ол «Саллааттар омоон суолларыгар» ананна.
Сарсыарда 11ч диэки Тэҥкэ нэһилиэгиттэн 3-4 кылаас үөрэнээччилэрэ физкультура учууталын кытта кытыастар кыһыл былааҕы өрө тутан, Бордоҥ алын кылааһын үөрэнээччилэригэр Марбаҕа аҕалан туттардылар. Марба ытык сирин историятын туһунан Бордоҥ оскуолатын түмэлин салайааччыта У.Т. Яковлева кэпсээтэ, Тэҥкэ баһылыга Н.В. Лидочен бу бырайыак үүнэр ыччакка олус улахан суолталааҕын эттэ.
Салгыы 12ч40мүн Бордоҥҥо Кыайыы пааматынньыгын таһыгар оскуола үөрэнээччилэрэ, «Беркут» ВПК иитиллээччилэрэ, нэһилиэк баһылыга Уаров К. А., оскуола директора Максимов М.А., Тэҥкэ баһылыга, директора үөрэнээччилэрин, учууталларын кытта холбоһук үөрүүлээх линейка тэриллэн ыытылынна. Манна 6-7-8 кылаас оҕолоро 🇷🇺🌟»Эдэр юнармеец»🌟🇷🇺кэккэтигэр киирэр анал бэлиэ туттулар, андаҕар эттилэр.
Онтон салгыы саҥа сүрэхтэммит эдэр армеецтар кыыһар кыһыл былаахтаах Бордоҥ кыраныыссатыгар тиийэн, «Беркут» ВПК кыра хамаандатыгар эстафетаны салҕаан туттардылар. Ол кэннэ Кыайыы знамятын Илимниир оскуолатыгар «День Победы» ырыанан доҕуһуоллатан үөрүүлээх миитиҥҥэ туттардылар. Илимниир нэһилиэгин баһылыга Н.А. Иванов оҕолору Улуу Кыайыы 80 сылынан эҕэрдэлээтэ, умнуллубат өйдөбүлгэ кыттыстыбыт диэн үөрүүтүн үллэһиннэ. Салгыы Кыайыы знамятын өрө көтөҕөн, саллааттар суолларын салҕаан, Илимниир, Бордоҥ, Тэҥкэ үөрэнээччилэрэ Турукталыыр суолга дылы сүүрдүлэр.
Өрүс нөҥүө сытар Хадан оскуолатын үөрэнээччилэрэ, коллектив нэһилиэктэрин мемориалыгар үөрүүлээх линейканы тэрийэн бырайыакка кыттыыны ыллылар.
Саамай долгутуулаах түгэн Сунтаартан чугас суол кытыытыгар баар обелиска ыытылынна.
Манна Тэҥкэ, Бордоҥ, Илимниир, Хадан баһылыктара, директордара, үөрэнээччилэрэ, саабыстара, директор сүбэһиттэрэ, түмэл үлэһиттэрэ бары түмсэн «Кыайыы 80 сылыгар» анаммыт тэрээһини түмүктээтилэр.
Бу Турукта суолунан сатыы барбыт биир дойдулаахтарбытыгар сүгүрүйэн, кинилэринэн киэн туттан туран «Беркут» ВПК улахан иитиллээчилэрэ гирлянда уурдулар.
Бордоҥ орто оскуолатын директора Михаил Алексеевич: «»Саллааттар омоон суолларынан…» бырайыак суолтата эһэлэрбит, хос эһэлэрбит алаһа дьиэлэриттэн араҕан, Аҕа дойдуларын көмүскүү барбыт суолларынан сүүрүүбүт, хорсун быһыыларыгар сүгүрүйүүбүт оҕолорго умнуллубат түгэн буолан өйдөрүгэр-санааларыгар үйэлэргэ хаалыа»- диэн санаатын эттэ.
Кэлэр кэнчээри ыччаппыт Аҕа дойду Улуу сэриитин туһунан историяны билиэхтэрэ, умнубакка өйдүү сылдьыахтара диэн маннык үйэтитии бырайыагын ыыттыбыт.
«Ким да умнуллубат, туох да умнуллубат»
Сүүрүү эстафетатын өйөөбүт Бордоҥ кустатын оскуолаларыгар, аҕа баһылыктарыгар, үөрэнээччилэригэр, төрөппүттэргэ барҕа махталбытын биллэрэбит!
⭐️🚩⭐️🚩⭐️🚩Кэлэн иһэр Улуу Кыайыы 80 сыллаах өрөгөйдөөх үбүлүөйүнэн эҕэрдэ буоллун!⭐️🚩⭐️🚩⭐️🚩
Түмэл үлэһитэ, саха тылын, литературатын учуутала С.Н. Павлова,
Директоры иитэр үлэҕэ солбуйааччы Л.Г.Петрова.
