Бу сыллар устата оскуола, дьиэ кэргэн, үөрэнээччи буолан ситимнээхтик үлэлээн, күн бүгүн, улууспут үөрэҕин системата ситиһиитэ сиэдэрэй, үөрүүтэ үгүс, кыайыыта-хотуута толору!
Бүгүн, хас биирдиибит, махтаныах тустаахпыт учууталларбытыгар. Хараттан үрүҥүн арааран ыларга ахсаабат сыратын хатылыы ууммут бастакы учууталга, кылаас салайааччытыгар, предмети биэрэр учууталга.
Бүгүн эҕэрдэ уонна махтал тылын этэбит төрөппүттэрбитигэр. Бэҕэһээ эрэ курдук буолуо, оҕоҕут кыракый ытысчаанын сиэтэн оскуола боруогун атыллаан киирбиккит. Онтон бүгүн тус санаалаах, ураты көрүүлээх хоһуун ыччат буолан үүнэн-сайдан турдаҕа. Чугас доҕор, өйөбүл, көмө-тирэх буолбуккутугар маанытык махтанабыт.
Күндү выпускниктар! Аан маҥнайгы чуорааҥҥыт эһигини билии дойдутугар ыҥырбыта, онтон бүгүн тыаһыыр тиһэх чуорааҥҥыт — олох киэҥ аартыгар ыҥырар. Эрэллээх аартыкка таһаарбыт оскуола дьиэҕит эркээйи уот буолан күннэтэ сырдыгы саҕаргытыгар, кэрэни кэрэхсии үүнэргитигэр истиӊ өйдөбүл буоллун.
Иннигитигэр — эппиэтинэстээх кэм. Бу сыллар устата ылбыт билиигитин бигэргэтэн, барбыккытын хатылаан, билбиккитин-көрбүккүтүн көмүскээн экзаменнаргытын ситиһиилээхтик туттарыҥ. Үүнүҥ үтүө, кэрэ киһи буола, айыҥ, тутуҥ, оҥоруҥ! Киһи буолбут ытык иэскитин дьон иннигэр толоруӊ! Кэскиллээҕи кэрэхсээҥ, ыллыктааҕы ырыҥалааҥ, ылсыбыккытын ыһыктымаҥ, санаабыккытын саргылааҥ!
Сунтаар улууһун үөрэҕин салалтатын салайааччыта Борис Николаевич Васильев
