Бэс ыйын 1 күнүгэр, оҕо көмүскэлин күнүгэр, Сунтаар улууһугар үгэс буолбут «Безопасное колесо» эдэр велосипедистар күрэхтэһиилэрэ буолан ааста.
Тэрээһин Сунтаардааҕы ГАИ сулууспатынан транспортнай эчэйиини сэрэтэр, чөл олоҕу тарҕатар уонна оскуола үөрэнээччилэрин ЮИД-хамсааһыннарыгар тардар сыаллаах үөрэх салалтатын кытары тэрилиннэ.
Күрэхтэһии бастакы түһүмэҕэр ПДД билиилэрин бэрэбиэркэлээтилэр, онно кыттааччылар 10 мүнүүтэ иһигэр 20 ыйытыыга хоруйдаатылар. Салгыы оскуола оҕолоро мэһэйдэри туораан, уустук трассаны ааһан көрдөрдүлэр. Түмүк түһүмэх – хамаанданан эстафета буолла.
Түмүк:
1 миэстэ — «Тускул 2» И.С. Иванов аатынан Сунтаар 2 нүөмэрдээх оскуолатын хамаандата;
2 миэстэ — «Дьулуур» В.Г. Павлов аатынан Сунтаар алын сүһүөх, И.С. Иванов аатынан Сунтаар 2 нүөмэрдээх, А.П. Павлов аатынан Сунтаар 1 нүөмэрдээх оскуолаларын хомуур хамаандата;
3 миэстэ — «Тускул 1» И.С. Иванов аатынан Сунтаар 2 нүөмэрдээх оскуолатын хамаадата.
Кыайыылаахтар уонна призердар грамоталарынан, мэтээллэринэн уонна бириистэринэн наҕараадаланнылар. Тэрийээччилэр кыттааччылары үрдүк бэлэмнээхтэрин бэлиэтээтилэр уонна ГИБДД сотрудниктарыгар махталларын биллэрдилэр.
