Балаҕан ыйын 1 күнэ — үөрэнээччилэргэ уонна учууталларга саамай күндү күн. Оскуола оҕо аймах күлүүтүнэн, чуопчаарар саҥатынан толору туолара — сарсыҥҥыга эрэли бэлэхтиир.
Быйылгы үөрэх дьылыгар 320 кырачаан оҕо маҥнайгы кылааска киирэн билии дойдутун устун айанныаҕа. Оҕолорбутугар үөрэхтэригэр саҥа сүһүөххэ үктэнии, доҕоттордуун көрсүһүү, саҥа ситиһиилэри кынаттыыр умнуллубат күннэр саҕаланаллар.
Үөрэҕи, билиини иҥэрии хаһан даҕаны тохтоон хаалбат, сыаллаах-соруктаах хаамыы буолар. Дойдубут социальнай-экономическэй ис кыаҕын уонна инновационнай сайдыыга дьоҕурун үөрэҕирии нөҥүө түстүүрбүт чахчы. Маны тэҥэ, үөрэхтээһин сайдыытыгар саамай тоҕоостоох усулуобуйаны общественнай көҕүлээһин көмөтүнэн тэрийэбит. Бастыҥ уопуту тэҥэ, саҥа саҕахтары арыйан үөрэхпит хаачыстыбатын тупсарабыт, кыайыынан кынаттанабыт, ситиһиилэринэн киэн туттабыт.
Учууталларга уонна төрөппүттэргэ ситиһиини, муударай өйү, тулууру баҕарабыт.
Үөрэнээччилэрбитигэр үүммүт үөрэх дьылыгар дьаныардаах буолууну, туйгун сыаналары баҕарабыт. Улуускут туһугар иитиилээх, үөрэхтээх, олоххо үөрүйэхтээх дьоһун дьон буолан тахсыаххыт диэн эрэнэбит.
Сунтаар улууһун үөрэҕин салалтатын салайааччыта Борис Николаевич Васильев
