Үөрэх үлэһиттэрин республикатааҕы атырдьах ыйынааҕы сүбэ мунньаҕын чэрчитинэн Өлүөхүмэ оройуона Сунтаар улууһугар уус-уран үөрэхтээһин эстафетатын «Рисуем все» бырайыагы олоххо киллэриини үөрүүлээх быһыыга-майгыга туттарбыта.
Биһиги улууспутугар бырайыак В. Ф. Абрамович аатынан Устье орто оскуолатыттан саҕаланна. Саха Өрөспүүбүлүкэтин бастакы президенэ Михаил Ефимович Николаев көҕүлээбит «Рисуем все» бырайыага үгүс сылларга педагогтары уонна оҕолору түмэн, айар кыахтарын арыйарга көмөлөһөр. Ол курдук, үөрэх тэрилтэлэригэр кэккэ тэрээһиннэр былааннаахтык ыытыллыахтара.
Сунтаар улууһун үөрэҕин салалтата «Рисуем все» бырайыак саҥа талааннары арыйан, искусство эйгэтигэр элбэх үөрэнээччини сыһыаран, айар-тутар олохторугар элбэх үөрүүнү бэлэхтиэҕэ диэн эрэллээх.
