Саха Өрөспүүбүлүкэтин үөрэҕин уонна наукатын миниистирэ Нюргуна Афанасьевна Соколова быйыл өрөмүөннэммит А.П. Павлов аатынан Сунтаар 1 нүөмэрдээх оскуолатыттан үлэтин саҕалаата. Объект федеральнай бырагыраамма чэрчитинэн саҥардыллан бу саҥа үөрэх дьылыгар аанын аспыта.
Салгыы Нюргуна Соколова Ай-Сатаа технопарка үлэтин билистэ, ону тэҥэ, Сунтаардааҕы политехническай лиссиэй-интэринээт тутулла турар саҥа дьиэтин көрдө. Үөрэх тэрилтэтин дириэктэрэ Олег Сосин иһитиннэрбитинэн, объект бэлэмэ 70% турар, үлэ тигинэччи барар.
Ону таһынан, бырагыраамма чэрчитинэн, 2025 сыл кулун тутар ыйыгар аһыллыбыт «Байҕал» аныгы спортивнай-плавательнай комплекска сырытта. Үс мэндиэмэннээх дьиэ 25 миэтэрэ усталаах 6 харбыыр балаһалаах, ону тэҥэ, тренажернай дьарыктанар сирдээх, буфеттаах, медицинскэй үлэһит, тириэньэрдэр хосторо уонна бассейн уутун ыраастыыр тиэхиничэскэй анал хостордоох.
Бастакы үлэ күнэ Сунтаар сэлиэнньэтин «Солнышко» 7 №-дээх оҕо сайдар киинин көрүүтүнэн түмүктэннэ, манна миниистир оскуола иннинээҕи үөрэхтээһиҥҥэ усулуобуйаны сыаналаата уонна сэбиэдиссэйи кытта кэпсэттэ.
Сунтаар улууһа үөрэх инфраструктуратын сайыннарыыга ситиһиилэри көрдөрөр. Аныгы оскуолалар уонна оҕо саадтара — оҕолорбут уонна Бүтүн Саха сирин кэскилин түстүүр.
Сарсын, о.э. балаҕан ыйын 10 күнүгэр, миниистир Сунтаар улууһун үөрэҕин үлэһиттэрин балаҕан ыйынааҕы үгэс буолбут сүбэ мунньаҕар кыттыаҕа, педагогтар ыйытыыларыгар хоруйдуоҕа.
