Сунтаар улууһун үөрэҕин үлэһиттэрин үгэс буолбут балаҕан ыйынааҕы мунньаҕын чэрчитинэн 200-тэн тахса үөрэх тэрилтэлэрин уонна исписэлиистэрин түмпүт тус сыаллаах былаһааккалар үлэлэрэ А.П. Павлов аатынан Сунтаар 1 нүөмэрдээх оскуолатыгар буолан ааста. Тэрээһин саҥа үөрэх эйгэтин сайыннарыыга биир кэлим сыһыаннары оҥорууга туһулунна.
Үлэ биэс дискуссионнай былаһааккаларынан тэриллэн, хас биирдиитэ үөрэҕи сайыннарыы тирээн турар суолталаах хайысхаларыгар ананан ыытылынна.
Бастакы «Пути повышения качества дошкольного образования» тиэмэлээх оскуола иннинээҕи үөрэхтээһин үлэһиттэрин былаһааккатыгар Сунтаар улууһугар оскуола иннинээҕи үөрэхтээһин хаачыстыбатын үрдэтэр суоллары дьүүллэстилэр. Былаһаакка үлэтигэр улуус оскуола иннинээҕи үөрэхтээһин тэрилтэлэрин сэбиэдиссэйдэрин солбуйааччылара, методистара уонна старшай иитээччилэрэ кыттыыны ыллылар. Сүрүн сыалынан – оҕону физическэй, интеллектуальнай, сиэр-майгы өттүнэн сайыннарыы, ону тэҥэ оскуолаҕа ситиһиилээхтик үөрэнэригэр сүрүн хайысхаларын дьүүллэһии буолла. «Пути повышения качества дошкольного образования» диэн киирии дакылааты оскуола иннинээҕи үөрэхтээһин салаатын сэбиэдиссэйэ Михайлова М.В. билиһиннэрдэ. Мичийэ Вячеславовна этиитигэр саҥа үөрэх дьылыгар сүрүн соруктары бэлиэтээтэ. Оскуола иннинээҕи үөрэхтээһин салаатын сүрүннүүр исписэлииһэ Павлова Н.С. кыттааччылары Саха Республикатын оскуола иннинээҕи үөрэх тэрилтэлэригэр туһанарга бигэргэтиллибит «Орлята-дошколята» саҥа үөрэтэр-методическай комплексын сиһилии билиһиннэрдэ. Улуус оҕо саадтарыгар комплекс олоххо киириитин методическай өрүттэрин уонна кэскиллэрин дьүүллэстилэр. Былаһаакка үлэтин түмүгэр Сунтаар улууһугар оскуола иннинээҕи үөрэхтээһин кэлэр кэмҥэ сайдыытын быһаарар түмүктэр ылылыннылар.
«Актуальные вопросы соблюдения законодательства в сфере образования» тиэмэнэн иккис былаһаакканы үөрэх салалтатын салайааччытын солбуйааччы Владимир Уаров үлэлэттэ. Манна уопсай уонна эбии үөрэхтээһин тэрилтэлэрин дириэктэрдэрэ, оҕо сайдар киинин сэбиэдиссэйдэрэ кыттыыны ыллылар. Салайааччы юридическай үөрэҕэ — тэрилтэ бигэ сайдыытын мэктиэтэ буолара саарбаҕа суох. Болҕомто киинигэр нормативнай-правовой базаҕа тиһэх уларыйыылар, лицензиялааһын, финансовай дисциплина, ону тэҥэ үөрэх процеһын бары кыттыылаахтарын бырааптарын хааччыйыы боппуруостара турдулар. Күннээҕи үлэҕэ сокуон нуормаларын туттууга ураты болҕомто уурулунна.
Үһүс былаһаакка үлэтин «Единая система воспитания и дополнительного образования» үөрэх салалтатын иитэр үлэҕэ уонна эбии үөрэхтээһин салаатын сэбиэдиссэйэ Александра Павлова салайан ыытта. Былаһаакка кыттыылаахтара уопсай уонна эбии үөрэхтээһини дьүөрэлээһин механизмнарын, иитии үлэтин бырагырааммаларын оҥорууну уонна олоххо киллэриини дьүүллэстилэр.
«Основные задачи повышения качества общего образования» дириэктэрдэри үөрэтэр, иитэр уонна научнай-методическай үлэҕэ солбуйааччыларыгар аналлаах төрдүс былаһаакка көдьүүстээхтик үлэлээтэ. Дискуссия киининэн үөрэнээччилэр үөрэхтэрин түмүктэрин үрдэтэр стратегиялары көрдөөһүн буолла. Үөрэх салалтатын бастакы солбуйааччы Елена Васильева салайыытынан кыттааччылар Государственнай итоговай аттестацияҕа бэлэмнэнии көдьүүстээх ньымаларын, үөрэх түмүгүнэн намыһах көрдөрүүлээх үөрэнээччилэри кытта тустаах үлэ, ону тэҥэ саҥардыллыбыт ФГОС усулуобуйатыгар педагогтары методическай өйөөһүн боппуруостарын дьүүллэстилэр.
«Организация общественного
контроля за охраной и условиями труда» тиэмэнэн Сунтаар улууһун үөрэҕин үлэһиттэрин профсоюһун бэрэссэдээтэлэ Нина Павлова бэһис былаһаакканы иилээн-саҕалаан ыытта. Манна үөрэх тэрилтэлэрин профкомнарын бэрэссэдээтэллэрэ, солбуйааччылар уонна үлэ харыстабылыгар эппиэтинэстээх тустаах үлэһиттэр кыттыыны ыллылар. Кыттааччылар үлэ харыстабылын нуормаларын тутуһууну хонтуруоллааһыны ыытыы, үлэһиттэр үлэлиир усулуобуйаларын сыаналааһын, производственнай эчэйиини сэрэтии уонна үлэһиттэр бырааптарын көмүскээһиҥҥэ профсоюз оруолун көрүү боппуруостарын ырыттылар.
