Бүгүн, балаҕан ыйын 25 күнүгэр, “Партизан” норуот айымньытын киинигэр Дойду үрдүнэн оскуола иннинээҕи тэрилтэ үлэһиттэрин күнүн көрсө үөрэх салалтата Бүтүн Арассыыйатааҕы «За достойный труд» акция чэрчитинэн «Академия талантов» креативнай, көҕүлүүр улуустааҕы бэстибээл ыытта. Манна улуус уһуйааннарыттан иитээччилэр бииргэ түмсэн, бастыҥ практикалары атастаһан, талааннарын арыйан, салгыы үлэлииллэригэр күүс-уох ыллылар. Ол курдук Тойбохой, Кириэстээх, Куокуну, Устье, Бордоҥ уонна Сунтаар нэһилиэгиттэн «Солнышко”, “Ньургуһун”, «Чебурашка», «Березка» оҕо сайдар кииннэриттэн көхтөөхтүк кытыннылар.
Тэрээһин сүрүн уратытынан иитээччилэр туох дьоҕурдаахтарын, сатабыллаахтарын көрдөрөр маастар-кылаастар буоллулар. Хас биирдии кыттааччы бэйэтэ интэриэһиргээбит хайысхатын талан саҥа үөрүйэхтэри ыллылар. Музыкальнай маастар-кылаас оҕо саадын күннээҕи олоҕор музыканы төһө көдьүүстээхтик туһаныахха сөбүн көрдөрдө. Үүнээйилэри хатарыы туспа болҕомтону тарта – иитээччилэр тоҕуоруһан туран гербарий оҥоруутун техникатын баһылаатылар. Ону таһынан ратангаттан оҥоһуу, маскарад көстүүмнэрин тигии, баатанан «Олонхо» дьоруойдарын оҥоруу маастар-кылаастара ыытылыннылар, бу үлэҕэ оҕолору эмиэ тардыахха сөбүн дакаастаатылар. Маны тэҥэ, иитээччилэр анал байыннай дьайыыга сылдьар биир дойдулаахтарбытыгар харысхал оҥордулар.
«Маннык көрсүһүүлэр олус наадалаахтар дии саныыбыт. Аҥардас уопут эрэ тарҕатааһын буолбакка, бэйэбит үлэбитигэр элбэх туһалааҕы ыларбыт саарбаҕа суох. Атын уһуйааннарга туох интэриэһинэй методиканы тутталларын көрөн, тута бэйэбитигэр киллэриэхпитин баҕарабыт”, — диэн кыттааччылар санааларын үллэстэллэр.
“Академия талантов” бастыҥ педагогическай уопуту тарҕатарга көдьүүстээх былаһаакка буолла. Иитээччилэр тирээн турар боппуруостары дьүүллэстилэр, булумньуларын үллэһиннилэр уонна бииргэ үлэлэлээһини дириҥэттилэр. Бары кыттааччыга оскуола иннинээҕи үөрэхтээһин салаатын салайааччыта Мичийэ Михайлова туоһу суругу кытта өйдөбүнньүк бэлиэ туттарда. Түмүккэ уопсай флешмоб ыытылынна — иитээччилэр идэлэрин дьоһун суолтатын биир түгэҥҥэ умнан ылан үҥкүү эйгэтигэр ыллардылар. Бу түгэн Сунтаар улууһун оскуола иннинээҕи тэрилтэлэрин кэллэктииптэрэ уратылаах биир сомоҕо буолалларын туоһулаата. Бу курдук бүгүҥҥү үөрүүлээх күн уһуйааннарбытыгар саамай сүрүн дьоҥҥо – иитиллээччилэргэ, оҕолорбутугар хайаан да тиэрдиллэр саҥа билиилэри эрэ буолбакка, үтүө иэйии эйгэтин хаалларда.
