Сунтаар улууһун үөрэҕин салалтатын уонна тус бэйэм ааппыттан иитээччилэри, уһуйаан бары үлэһиттэрин идэлээх бырааһынньыккытынан итиитик-истиҥник эҕэрдэлиибин! Улууспут хас биирдии уһуйаана – кэнэҕэски көлүөнэбит уопсастыба эйгэтигэр үүнэригэр-сайдарыгар үөрэх-иитии бастакы кэрдииһин ааһар инники күөҥҥэ турар сүрүн тэрилтэлэрбит буолаҕыт.
Төрөппүтү кытары тэҥҥэ оҕолорбутун иитиигэ акылааты уурар, эргиччи үүнүүлээх-сайдыылаах буолууга кыһаллар, билиигэ дьоҕуру бастакынан иҥэрэр – биһиги уһуйааччыларбыт, иитээччилэрбит, көмө персонал буолаҕыт. Уһуйаан кырачаан оҕоттон саҕалаан оскуолаҕа бэлэмнээх оҕоҕо тиийэ оҥорор сүрүн соруга туохха да кэмнэммэт сүҥкэн. Дойдубут патриотун, дьоһун үлэһит, сиэрдээх майгылаах көлүөнэтин иитэн таһаарыыга иитээччилэр оруоллара улахан. Оҕо кыра эрдэҕиттэн ылар үөрүйэхтэрэ, олоҕу көрүүтэ-истиитэ, майгы-сигили өрүттэрэ төрөппүттэриттэн уонна иитээччилэриттэн тутулуктаах. Онон, сүрдээх эппиэтинэстээх уонна анал соруктаах идэлээх буолаҥҥыт үлэҕит ураты эйгэлээх, айымньылаах айылгылаах, мааны махталлаах.
Бү үөрүүлээх күнү көрсө эһиэхэ барыгытыгар дьоллоох-соргулаах, байылыат олоҕу, саха алмааһын курдук чиргэл, чэгиэн доруобуйаны, үлэҕэ өркөн ситиһиилэри баҕарабыт! Оскуола иннинээҕи үөрэх хаачыстыбатын үрдэтэргэ өссө элбэҕи оҥоруоххут диэн бигэ эрэллээхпит.
Үөрэх салалтатын салайааччыта Борис Николаевич Васильев
