«Дьиэ кэргэн уонна үөрэх систиэмэтэ: оҕолорбут тустарыгар сомоҕолоһуу» улуустааҕы төрөппүттэр форумнара Балаҕан ыйын 30 күнүгэр Сунтаар улууһун үөрэҕин управлениета(сал.Борис Васильев) «Дьиэ кэргэн уонна үөрэх систиэмэтэ: оҕолорбут тустарыгар сомоҕолоһуу» диэн улуустааҕы төрөппүттэр форумнарын тэрийэн ыытта. Тэрээһин Партизан норуот айымньытын дьиэтигэр ыытылынна.
Форумҥа Сунтаар улууһун үөрэҕин управлениетын, улуус оскуолаларын коллективтара анал байыаннай дьайыыга сылдьар биир дойдулаахтарбытыгар гуманитарнай көмөнү оҥороннор «Харысхал» общественнай түмсүүгэ туттардылар. Салайааччылара Жанна Макарова салалтатынан түмсүү кыттыылаахтара маскировочнай сетка тигиитигэр интэриэһинэй маастар-кылаас ыыттылар, үлэлэрин быыстапкатын сиһилии билиһиннэрдилэр.
Үөрэх уонна иитии тирэҕинэн буолаллар үгэс буолбут национальнай сыанабыллар, кинилэр көлүөнэттэн көлүөнэҕэ бэриллэн иһиэхтээхтэр диэн Россия үөрэҕин миниистирэ Сергей Кравцов бэлиэтээбитэ. Сунтаар улууһугар 56 үөрэх тэрилтэлэрэ бааллар: 33 оскуола, 19 оҕо уһуйаана, 4 эбии үөрэхтээһин тэрилтэлэрэ. Форум үөрүүлээх аһыллыытыгар Сунтаар улууһун үөрэҕин управлениетын салайааччыта Борис Васильев эҕэрдэ тылын эттэ. Төрөппүттэр инициативаларын бырайыактарын конкурсугар 10 оскуола кытынна. Кыайыылааҕынан Сунтаар №2 орто оскуола «Мини-контактный зоопарк на пришкольном участке» бырайыага буолла. 2 миэстэни Кутана орто оскуолатын «Өбүгэ сатабыла-уол оҕо дьарыга», 3 миэстэни Аллыҥа орто оскуолатын «Оҕо сынньалаҥын тэрийии», Тойбохой орто оскуолатын «Один день в армии» бырайыактара ыллылар.
Форум иккис чааһыгар лекционнай былаһааккаҕа тыл эттилэр: Александра Павлова, Сунтаар улууһун үөрэҕин управлениетын иитии уонна эбии үөрэхтээһин сэбиэдиссэйэ; Надежда Потапова, Н.М.Родионова аатынан Сунтаардааҕы оҕо дьоҕурун сайыннарар киин педагога; Сардана Винокурова, “Алмазэргиэнбаан” сүрүннүүр специалиһа; Михаил Тимофеев, Сунтаардааҕы социальнай харалта управлениетын салайааччыта; Константин Тотонов, Сунтаар улууһун Аҕа түмсүүтүн бэрэссэдээтэли солбуйааччыта; Евдокия Максимова, “Арассыыйа ийэлэрэ” Сунтаар улууһунааҕы общественнай хамсааһын бэрэссэдээтэлин солбуйааччыта; Ульяна Жиркова, Ис дьыала министиэристибэтин Сунтаар улууһунааҕы отделын сокуоннай саастарын ситэ илик оҕолору кытары үлэ старшай инспектора; Мария Егорова, “Бастакылар хамсааһыннара” Сунтаар улууһунааҕы отделениетын специалиһа.
Форумҥа төрөппүт блогердары Тускулаана Кобельянова-Горохованы, Жанна Макарованы, Виктория Тимофееваны кытары көрсүһүү ыытылынна. Оҕону иитии киэҥ өйдөбүллээҕин, 21-с үйэҕэ сайдыы муҥутуурдук тэнийэн, олох бары эйгэтигэр күүскэ өтөн киирбит кэмигэр киэҥ билиилээх, дьоҕурдаах, сатабыллаах, сайдам майгылаах, дойдутун ытыктыыр оҕону иитиигэ төрөппүт оруолун, төрөөбүт тыл, волонтерство, төрүччүнү үөрэтии тула истиҥ-иһирэх кэпсэтии буолла.
Форум кыттааччылара маннык ис хоһоонноох тэрээһин улуус оскуолаларын төрөппүттэригэр туһалааҕын, тэрээһин көрүҥэ элбээн, кэҥэтиллэн тэриллэригэр үтүө тыллары, баҕа санааларын тиэртилэр.
Александра Павлова(Николаева)
