Алтынньы 7 күнүгэр И.С. Иванов аатынан Сунтаар иккис нүөмэрдээх оскуолатыгар оскуола библиотекатын учуоттаах докумуоннарын кытта үлэни тэрийиигэ аналлаах Светлана Тимофеевна Федорова тус сэминээрэ ыытылынна. Улуус библиотекардарыгар тэриллибит тэрээһин профессиональнай кэпсэтиигэ уонна уопут атастаһыытыгар суолталаах былаһаакка буолла.
Сэминээр практическай чааһыгар Светлана Федорова «Основная внутрибиблиотечная документация» тиэмэҕэ кэпсээтэ. Кини оскуола хас биирдии библиотекатыгар булгуччулаах докумуоннары сиһилии сырдатта, бэйэтин уопутун үллэһиннэ.
А.П. Павлов аатынан Сунтаар 1 нүөмэрдээх оскуолатын библиотекара Сивцева Н.Н. үөрэх фондатын тупсарыытыгар ФПУ саҥа прикаһын тула дьүүллэһиини ыытта. Маны таһынан СПТЛ-И педагог-библиотекара Егорова А.А. «Знакомство с великими русскими писателями через QR-код» маастар-кылааһын ыытта. Үөрэнээччилэри ааҕыыга, литератураҕа интэриэстэрин үрдэтэргэ аныгы технологиялары библиотека үлэтигэр хайдах холбууру көрдөрдө.
Кыттааччылар оскуола түмэлигэр экскурсияҕа сырыттылар, ону тэҥэ 2 нүөмэрдээх оскуола саха тылын учуутала Афанасьева С.А. «Ийэ тылын кэскилэ» дакылаатын билиһиннэрдэ — тылы харыстааһын, үөрэтии суолтатын тоһоҕолоон бэлиэтээтэ.
Бүгүҥҥү үлэ күнүн түмүгэр дьүүллэһэр, тирээн турар кыһалҕаларын үллэстэр уонна ону быһаарар суоллары тобулалларыгар үөрэх салалтатын информационнай-методическай салаатын исписэлииһэ Джулия Александрова төгүрүк остуол тэрийэн ыытта.
Сэминээр саҥа исписэлиистэргэ библиотека докумуоннарын кытта үлэлииргэ уопсай өйдөбүлү үөскэттэ уонна улууска оскуола библиотекаларын икки ардыларынааҕы бииргэ үлэлээһини бөҕөргөтүү нөҥүө инники сайдыы суолларын көрдөрдө.
