Алтынньы 8 күнүгэр «Развитие речевой активности у детей с особыми образовательными потребностями» диэн киэҥ далааһыннаах региональнай семинар-практикум буолла. Манна барыта 124 педагог кыттыыны ылла.
Сэминээри коррекционнай оскуола дириэктэрэ Анисия Семеновна Игнатьева тылын этиитинэн арыйда. Кини этиитигэр оҕо ханна да үөрэммитин иһин – анал тэрилтэҕэ ду эбэтэр интеграция усулуобуйатыгар – анал үөрэх бэриллиэхтээҕин тоһоҕолоон бэлиэтээтэ.
Ол кэннэ тута аһаҕас уруоктар ыытылыннылар. Ол курдук алын кылаас логопед-учуутала Ольга Михайловна Назарова уонна музыка учуутала Роман Родионович Амонов 5 кылаастарга логопедическай дьарыгы ыыттылар. Педагогтар мнемотехника ньымата оҕолорго ырыаны үөрэтэргэ хайдах көмөлөһөрүн көрдөрдүлэр.
Алын кылаас учууталлара Луизия Октябриновна Матросова уонна Рената Аркадьевна Никитина 3 кылаастарга психомоториканы уонна сенсорнай процесстары сайыннарыыга дьарык ыыттылар. Алын кылаас учуутала Оксана Серафимовна Попова 2 кылаастарга «Листопад слов» дьарыгар оҕо тылдьытын оонньуу көрүҥүнэн хайдах байытыахха сөбүн көрдөрдө. Ону тэҥэ, олигофренопедагог Елена Алексеевна Олесова «По одежке встречают» диэн 5 кылаастарга социальнай олоххо үөрүйэхтэри сайыннарар уруогун ыытта. Кыттааччылар уруоктарга сылдьан саҥа билиилэри ыллылар, ол кэннэ араас маастар-кылаастарга сырыттылар: тыл сайдыытыгар гимнастика уонна массаж техникаларын көрдүлэр, технология учууталлара «Алгыстаах Харысхал”, “Саха инструменнарын туһанан оҕо саҥарар дьоҕурун сайыннарыы” айар мастерскойдара үлэлээтэ.
Күн иккис аҥарыгар «Партизан» Норуот айымньытын киинигэр бырайыак үлэтэ ыытылынна. Дириэктэр Анисия Семновна оҕолору патриотическай иитиигэ туох үлэ ыытылларын билиһиннэрдэ. Кыттааччылар«Детская телестудия как средство развития речи и коммуникативных возможностей» тиэмэҕэ олигофренопедагог Надежда Александровна Семенова ыыппыт дьүүллэһиитигэр кыттыстылар. Маны тэҥэ атыы-эргиэн уонна бэйэ оҥоһук оҕолору сайыннарар оонньуурдар дьаарбаҥкалара дьон-сэргэ болҕомтотун тарта. Тэрээһини учууталлар уонна үөрэнээччилэр кыттыылаах сэргэх кэнсиэр киэргэттэ.
Түмүккэ аһаҕас кэпсэтии ыытылынна, кыттааччылар бэйэлэрин санааларын үллэһиннилэр. Бүгүҥҥү күҥҥэ педагогтар билиилэрин хаҥатан, элбэх саҥаны иҥэринэн барбыттара буолуо диэн эрэнэбит.
