Биир идэлээхтэрин, наставниктарын, аҕа табаарыстарын айымньылаах үлэтин билсиһэ улууспут 21 оскуолатыттан 29 физкультура учууталлара кэлэн кыттыыны ыллылар. Бу тэрээһиҥҥэ Владимир Владимирович үөрэнээччилэрэ, Элгээйи оскуолатын коллектива күүс-көмө буоллулар.
Айар үлэ семинарын үөрүүлээх чааһыгар Элгээйи нэһилиэгин баһылыгын солбуйааччыта Охлопков Николай Николаевич, үөрэх управлениетын методиһа Саввинова Саргылаана Николаевна, оскуолабыт директора Игнатьева Софья Васильевна эҕэрдэ тылларын анаатылар, бүгүҥҥү семинар кыттыылаахтарыгар ситиһиини баҕардылар.
Семинар маҥнайгы чааһыгар аһаҕас уруоктар буоллулар. Владимир Владимирович учууталларга волейбол оонньуутун кистэлэҥнэрин, үөрэтии методикатын, ньымаларын сиһилии көрдөрдө. Иккис уруогу 5 «а» кылаас үөрэнээччилэригэр Константинова Александра Анатольевна ыытта.
Салгыы Элгээйи орто оскуолатын физкультураҕа учууталын Яковлев Александр Афанасьевич кэриэһигэр оскуола оҕолоругар уонна авторскай семинар кыттыылаахтарыгар волейбол күрэҕэ буолан ааста. Семинары көрө-истэ кэлбит учууталлар волейбол күрэҕэр илин-кэлин түсүһэн күрэхтэһэн ыллылар.
Тэрээһин бүтүүтэ минньигэс астаах остуол тула олорон Владимир Владимирович 24 сыл устата физкультура учууталынан үлэлээн мунньубут уопутун кэпсээтэ. Кини аҕа табаарыһа, наставнига Винокуров Савва Константинович эдэр коллегаларыгар баҕа санаатын тиэрдэн, олус туһалаах сэһэргэһиини тэрийдэ.
Бу тэрээһиннэр оскуолабыт 150 юбилейыгар анаан ыытылыннылар.
