Бүгүн, алтынньы 9 күнүгэр, С.А. Зверев аатынан норуот айымнытын киинигэр биир саамай сылаас, истиҥ бырааһынньыкка — Аан дойдутааҕы Учуутал күнүгэр аналлаах кэнсиэр ыытылынна. Үөрэх салалтата үүнэр көлүөнэбитигэр билиини эрэ биэрэн буолбакка, оҕону иитэн-такайан, бары өттүнэн сайыннарар ытык дьоммутун ис сүрэхпититтэн эҕэрдэлиир туһугар кэнсиэр-церемония тэрийдэ.
Тэрээһини Сунтаардааҕы алын сүөһүөх оскуолатын үөрэнээччилэрэ хоһооннорунан арыйдылар. Ыалдьыттары көрсө бэйэлэрин эҕэрдэ тылларын эттилэр Сунтаар улууһун баһылыгын социальнай боппуруостарга уонна имиджевай бэлиитикэҕэ солбуйааччы Мирослав Иванов уонна үөрэх салалтатын салайааччыта Борис Васильев. Педагогтарга бүтүн улуус кэскилин сайыннарыыга сүдү кылааттарын иһин махтал тылларын эттилэр.
Тэрээһин киин өттүгэр наҕараадалааһын сиэрэ-туома ыытылынна. Үтүөлээх наҕараадалары — бочуоттаах грамоталары, махтал суруктары уонна туйгун бэлиэлэри — бу күн улуус араас үөрэх тэрилтэтиттэн 86 педагог тутта: үтүө дьыалаларыгар бэриниилэрэ кэллиэгэлэригэр, үөрэнээччилэригэр чаҕылхай холобур буолар иитээччилэр, учууталлар, инструктордар уонна уһуйааччылар.
Айар кэллэктииптэр уонна ырыаһыттар сыанаттан бэйэлэрин музыкальнай нүөмэрдэрин бэлэхтээтилэр, хатыламмат, үөрүүлээх эйгэни тэрийдилэр. Хас биирдии нүөмэр педагогтарга истиҥ махталынан уонна ытыктабылынан туолла.
Ураты долгутуулаах түгэнинэн А.П. Павлов аатынан Сунтаар 1 нүөмэрдээх оскуолатын өр сылга салайан кэлбит үтүө киһибитин РФ уопсай үөрэхтээһинин бочуоттаах үлэһитэ Афанасий Спиридонович Матвеевы бочуоттаах сынньалаҥҥа атаарыы сиэрэ-туома буолла. Бииргэ үлэлиир кэллиэгэрэ, доҕотторо, үөрэнээччилэрэ өр сыллаах эҥкилэ суох үлэтин, муударай салалтатын уонна Сунтаар улууһун үөрэҕин сайдыытыгар улахан кылаатын иһин дириҥ махталларын биллэрэн итиитик-истиҥник ыыттылар.
Бүгүҥҥү үөрүүлээх күн үөрэх эйгэтин үлэһиттэригэр барыларыгар ытыктабыл, таптал көрдөрүүтэ буолла. Өссө төгүл учууталларбытын, наҕараадаламмыт үлэһиттэри эҕэрдэлиибит, инникитин таһаарыылаах үлэни баҕарабыт. Күннэтэ күүрүүлээхтик үлэлиир хорсун быһыы — бу сырдыкка-кэрэҕэ уһуйуу, бэриниилээх буолуу бэлиэтэ.
