Саха Өрөспүүбүлүкэтин бастакы президенэ Михаил Николаев көҕүлээбит «Бары уруһуйдуубут» диэн бырайыак көһөрүллэ сылдьар бэлиэтин Куокуну орто оскуолатыттан эбии үөрэхтээһин педагогтара Матрена Иванова, Марианна Федорова, уруһуй учуутала Саргылана Константинова Тойбохой орто оскуолатын уруһуй учууталыгар Татьяна Могусоваҕа, «Ньургуһун» оҕо уһуйаанын иитээччитигэр Надежда Леонтьеваҕа үөрүүлээх быһыыга-майгыга туттардылар. «Бары уруһуйдуубут» бырайыак чэрчитинэн оҕолор уруһуйдарын быыстапката тэрилиннэ, арт-флешмоб ыытылынна.
Сунтаар улууһун үөрэҕин тэрилтэлэринэн «Бары уруһуйдуубут» бырайыак бэлиэтин эстафетата салҕанар. Бу кэрэни кэрэхсии үөрэнэргэ, тулалыыр эйгэни, айылҕаны уруһуйдаан хоһуйарга, ойуулуур-дьүһүннүүр искусствоҕа үүнэр көлүөнэни уһуйарга, үөрэтэргэ туhуламмыт бырайыак өссө да элбэх оҕону, төрөппүттэри хабан Сунтаар улууһун үөрэҕин тэрилтэлэринэн саҥа талааннары арыйан, кэнчээри ыччат дьоҕура сайдарыгар кэскиллээх аартыктаннын.
Александра Павлова(Николаева)
