Олунньу 26 күнүгэр Россия Федерациятын үөрэҕириитин туйгуна, үлэ бэтэрээнэ, улуус бочуттаах олохтооҕо Татьяна Федоровна Божедонованы 80 саастаах үбүлүөйүнэн эҕэрдэлии С.А. Зверев-Кыыл Уолун аатынан Сунтаардааҕы норуот айымньытын киинигэр дьон-сэргэ муһунна. Сунтаар педагогическай уопсастыбаннаһа, кэллиэгэлэрэ, доҕотторо уонна үөрэнээччилэрэ сылаас эҕэрдэлэрин этэн, идэтигэр бэриниилээх буолуутун уонна оҕолорго истиҥ тапталын бэлиэтээтилэр.
Тэрээһин олус истиҥ, сылаас эйгэҕэ ааста. Татьяна Федоровна Үөһээ Дьааҥыттан төрүттээх, А. И. Герцен аатынан Ленинградтааҕы судаарыстыбаннай педагогика институутун бүтэрэн, Сунтаарга 1970 сыллаахха кэлбитэ уонна дьылҕатын биһиги сирбитин кытта ситимнээбитэ. Чуолаан кини кыһамньытынан улуус суолталаах үөрэх тэрилтэлэрэ тэриллибиттэрэ: 1972 сыллаахха «Солнышко» ясли-садтан саҕалаан сүүһүнэн эдэр педагогтарга суолларын арыйбыт уолаттар гимназияларыгар тиийэ. Уопсастыбаннай тэрилтэлэр бэрэстэбиитэллэриттэн Татьяна Федоровна аадырыһыгар махтал тыллара иһилиннилэр. Кини талааннаах педагог эрэ буолбакка, элбэх социальнай көҕүлээһиннэргэ сыратын-сылбатын уурбута. Ол курдук саллаат ийэлэрин кэмитиэтин төрүтүгэр турбута, инбэлиит оҕолоох ыаллар «Эрэл” кулууптарын салайбыта, халаан уутуттан эмсэҕэлээбиттэргэ гуманитарнай көмөнү оҥорооһуну салайбыта. Татьяна Федоровна үгүс үөрэнээччилэрэ сылаас ахтыыларын үллэһиннилэр. Кинилэр учууталларын муудараһын, ирдэбиллээҕин кэпсээтилэр.
Ол курдук үрдүк наҕарааданы туттарыы сиэрэ-туома ыытылынна. Өр сыллаах үтүө суобастаах үлэтин, үөрэх тиһигэр уһулуччулаах тус кылаатын уонна активнай уопсастыбаннай үлэтин иһин Татьяна Федоровна Божедоноваҕа «Сунтаар улууһун Бочуоттаах бэтэрээнэ» аат иҥэрилиннэ. Үөрэх салалтата Татьяна Федоровнаҕа чугас дьонун сылааһынан, болҕомтолорунан туолбут чэгиэн-чэбдик доруобуйаны, тус олоххор дьолу-соргуну баҕарабыт, улууспут үөрэҕин тиһигэр сүҥкэн кылааты бэлэхтээбиккэр дириҥник махтанабыт.
