Бу дьыл муус устар 15, 16 күннэригэр “Бартыһаан” норуот айымньытын театральнай киинигэр “Алыптаах Мааска. Оҕолор” — 2026 улуустааҕы оскуолалар тыйаатыр — устуудьуйаларын ортотугар көрүү-күрэх буолан ааста.
Кыттыыны ыллылар:
-Түбэй- Дьаархан С.А. Зверев аатынан орто оскуолатын (директор Григорьева И.Г) “Аман Өс” тыйаатыр- устуудьуйата. “Эбирчээнэ куурусса” нуучча норуотун остуоруйатынан матыыптарынан остуоруйа – испэхтээк. Салайааччылар: Александрова А.К., Петрова Т.Д., Егорова М.С. ;
— Г.Е.Бессонов аатынан Тойбохой орто оскуолата (директор Уаров П.П.). «Кэнчээри» тыйаатыр- устуудьуйа. Н.Г. Золотарев — Н. Якутскай «Алмааһы көрдөөччүлэр” айымньытынан “Сайдыы суолунан ”испэхтээк. Салайааччылар: Васильева Е.В., Николаев С.В., Винокурова С. Е.;
— И.А. Дорофеев аатынан Маар – Күөл орто оскуолата (директор Тотонова Л.С.), Э. Соколов- Тулусхан кэпсээнинэн “Чыпчылыйыах түгэннэр” испэхтээк. Салайааччы Эверстова Т.В.
— Сунтаар В.Г. Павлов аатынан алын сүһүөх оскуолата (директор Еремеев Г.М.). Н. Заболоцкай “Болот моһуогуруута» испэхтээк. Салайааччылар: Герасимова Т.И., Кларова А.А., Лукина И. Н.;
— В.Г. Акимов аатынан Бүлүүчээн лицей – интерната (директор Степанов В.В.). «Маччаҕа» номох – испэхтээк. Николаева М.Н, Сидорова А.А.;
— А.К. Акимов аатынан Күүкэй орто оскуолата (директор Алексеев Е.И.). А. А. Иванов – Күндэ “Тыа үөһүгэр” испэхтээк. “Ситим” тыйаатыр устуудьуйа. Салайааччы Фефелова Н.А.;
— Л. Попов аатынан Арыылаах агрохайысхалаах орто оскуолата (директор Никитина Л.Г.). Н.М. Петров “Ол үйэлэр дуорааннара» романынан “Хоһууну уһуйуу”. “Кэрэл” тыйаатыр – устуудьуйа. Салайааччы Григорьева Ф.И.;
— Бордоҥ орто оскуолата (директор Максимов М.А.). Б. Васильев “А зори здест тихие” сэһэнинэн “Саһарҕа нуурал чуумпута”. «Ситим» тыйаатыр – устуудьуйа. Салайааччылар: Петрова Л. Г., Никитина А.М.;
— Н.М. Родионова аатынан Сунтаардааҕы оҕо дьоҕурун сайыннарар киин (директор Антонова А.В.). А.Иванов — Күндэ кэпсээнинэн “Иэдээннээх баҕа”. “Кэрэмэс” тыйаатыр – устуудьуйа. Салайааччы Игнатьева Т.И.
— И.Г.Спиридонов аатынан Кириэстээх политехническай орто оскуолата (директор Тараяров Е.Б.) , А.Н. Толстой “Буратино” остуоруйатынан испэхтээк. “АртИст”тыйаатыр – устуудьуйа. Салайааччы Макаринская Ж.А.
Көрүү — күрэххэ 10 тыйаатыр устуудьуйа 10 испэхтээги көрдөрдө, 141 оҕо оонньоон кытынна, 17 педагог-салайааччы.
Дьүүллүүр сүбэҕэ үлэлээтилэр:
— О Юрий Дмитриевич – бэрэссэдээтэл, СӨ култууратын үтүөлээх үлэһитэ режиссер, Алыптаах Мааска . Оҕолор» бырайыак сүрүн ааптара ;
— Роман Родионович Амонов – Сунтаар сэлиэнньэтин “Бартыһаан» театральнай киинин звукорежиссера;
— Федоров Герасим Владиславович – Сунтаар сэлиэнньэтин “Бартыһаан» театральнай киинин методиһа;
— Даллаах Амаана Марха кыыҺа – Сунтаардааҕы технологическай колледж иитэр – үөрэтэр үлэҕэ дириэктэри солбуйааччы. Ыччат бэлиитикэтин туйгуна, Российскай Федерация үөрэҕириитин бочуоттаах үлэһитэ. В. Николаев аатынан Сунтаар народнай театрын артыыската;
-Зоя Михайловна Иванова — «Чебурашка» о5о сайдар киинин иитээччитэ, СӨ үөрэҕириитин туйгуна, В. Николаев аатынан Сунтаар народнай театрын артыыската.
Көрүү — күрэххэ 10 тыйаатыр устуудьуйа 10 испэхтээги көрдөрдө, 141 оҕо оонньоон кытынна, 17 педагог-салайааччы баар.
Көрүү – күрэххэ тыйаатыр устуудьуйалар дириҥ ис хоһоонноох айымньылары талан олус кыһаллан бэлэмнэнэн кэлбиттэр. Холобура, Тойбохой оскуолатын «Кэнчээри” тыйаатыр устуудьуйата Николай Золотарев – Якутскай “Алмааһы көрдөөччүлэр” сэһэнинэн “Сайдыы суолунан”диэн испэхтээк, Бүлүүчээннэр бэйэлэрин нэһилиэктэрин төрүттэммитин туһунан Кириллин А.М. суруйуутунан номоххо олоҕурбут “Маччаҕа” испэхтээк туруоран көрдөрдүлэр. Саха классик суруйааччыларын А. Иванов – Күндэ кэпсээннэринэн “Тыа үөһүгэр” Күүкэй оскуолата “Ситим” тыйаатыр – устуудьуйата, Н.М. Родионова аатынан оҕо дьоҕурун сайыннарар киин ”Кэрэмэс” тыйаатыр устуудьуйа “Иэдээннээх баҕа”, Сунтаар В.Г. Павлов аатынан алын сүһүөх оскуолата Николай Заболоцкай – Чысхаан кэпсээнинэн “Болот моҺуогуруулара” диэн драма көрдөрөн улахан сэҥээриини ыллылар. Түбэй – Дьаархан “Аман Өс” тыйаатыр устуудьуйа “Курочка ряба” нуучча норуотун остуоруйатынан “Эбирчээнэ куурусса” остуоруйа – испэхтээк көрдөрөн соҺуттулар. Кириэстээх “АртИст” тыйаатыр – устуудьуйата А.Н. Толстой “Буратино” музыкальнай испэхтээги олус үчүгэйдик оонньоотулар.
Дьүүллүүр сүбэ хас биирдии көрдөрүү — испэхтээккэ оонньообут оҕолору, салайааччылары мунньан, атах тэпсэн олорон киэҥ ырытыылары оҥордулар, суолталаах сүбэлэри биэрдилэр. Устуудьуйалар быйылгы көрдөрбүт испэхтээктэрэ былырыыҥҥытааҕар таҺымнара лаппа үрдээбитин тоҺоҕолоон бэлиэтээтилэр. Инникитин ыйыллыбыт итэҕэстэри көннөрөн нэһилиэктэригэр көрдөрөн тыйаатыр ускуустубатыгар көрөөччүлэри угуйа, бу курдук салгыы атын даҕаны айымньылары туруоран көрдөрөн көрөөччүлэрин биҺирэбилин ыла туруохтара диэн эрэллэрин тириэртилэр.
Барыта 15 номинация:
1. «Бастыҥ испэхтээк»
2. «Бастыҥ режиссерскай үлэ»
3. «Бастыҥ сүрүн оруол» (уол)
4. «Бастыҥ сүрүн оруол» (кыыс)
5. «Бастыҥ иккис былаан оруол» (уол)
6. «Бастыҥ иккис былаан оруол» (кыыс)
7. «Кэскиллээх артыыс» (уол)
8. «Кэскиллээх артыыс» (кыыс)
9. «Чаҕылхай кыра оруол» (уол)
10. «Чаҕылхай кыра оруол» (кыыс)
11. «Бастыҥ сценография»
12. «Бастыҥ музыкальнай киэргэтии»
13. «Бастыҥ көстүүм»
14. «Бастыҥ театральнай кэллэктиип салайааччыта»
15 « Дьүүллүүр сүбэ анал бирииһэ»
Дьүүллүүр сүбэ, суол сабыллыбытынан сибээстээн, түмүгү ыам ыйыгар номинациялары туттарыы улахан Үөрүүлээх түһүлгэтигэр биллэриэҕэ.
Ити курдук, «Алыптаах мааска. Оҕолор» — 2026 олус ситиһиилээх түмүктэрдээх буолла. Сунтаар улууһун оскуолаларын тыйаатыр устуудьуйалара олус үчүгэй айымньылары көрдөрөн көрөөччүлэрин куруук маннык үөрдэ- көтүтэ уонна үүнэ – сайда турдуннар!
Ирина Митина, «Алыптаах Мааска. Оҕолор» бырайыак иккис ааптара, СӨ култууратын туйгуна.
