Информационнай-методическэй отдел кылаабынай специалиһа М.И.Попова, оскуола иннинээҕи үөрэхтээһин отдел кылаабынай специалиһа Н.С.Павлова салайыыларынан тустаах комиссия Сунтаар нэһилиэгин «Чебурашка» (сэб. А.В.Ксенофонтова), «Кыталык» (сэб.В.А.Петрова), «Туллукчаан» (сэб.М.Д.Федорова) оҕо уһуйааннарыгар сырыттылар. Сунтаар коррекционнай оскуолатын специалистара, Сунтаар алын сүһүөх оскуолатын дириэктэрэ Г.М.Еремеев, учууталлар дьарыктарга сырыттылар, методическай көмөлөрү, сүбэлэри биэрдилэр. Ол курдук, иитээччилэр Семенова Мария Дарьяновна, Герасимова Мария Евгеньевна(«Чебурашка» оҕо уһуйаана), Николаева Саргылана Аркадьевна («Кыталык» оҕо уһуйаана), Попова Анна Владимировна, Борисова Ульяна Васильевна («Туллукчаан» оҕо уһуйаана) олус интэриэһинэй, дириҥ ис-хоһоонноох, күһүн оскуолаҕа киириэхтээх оҕолор бэлэмнээх буолууларыгар тус сыаллаах аһаҕас дьарыктары ыыттылар. Тылы сайыннарыыга оҕолору сахалыы саҥарарга үөрэппиттэрэ олус кэрэхсэбиллээх. Оскуолаҕа киирии-оҕоҕо саҥа кэрдиискэ тахсыы, олоҕор суолталаах кэм буолар. Оҕо уйулҕатын тутулуга, сайдыыта оскуолаҕа бэлэмнээх буолуутугар улахан оруоллаах. Бу хайысхаҕа Сунтаар нэһилиэгин «Чебурашка», «Кыталык», «Туллукчаан» оҕо уһуйааннарыгар үүнэр көлүөнэ билии аартыгар эрэллээхтик хардыылаан киирэн үөрэнэригэр кэскиллээхтик үлэлииллэр.
