Хас биирдии хаһаайка күөххэ үктэммиччэ оҕуруот аһын арааһын, кэрэ сибэкки эгэлгэтин арассаадалаан, онтун араарар, буорун бэрийэр түбүктээх күннэрэ үүннүлэр. Бу күннэргэ “Росток” эдэр оҕуруотчуттар кулууптарыгар Сунтаар нэһилиэгин оскуолаларыттан Асель Саввинова, Алекса Морозова, Уруйдаана Никифорова, Арина Портнягина уонна Милена Малышева оҕуруот аһын, сибэкки арассаадатын үүннэрэн, уу кутан бүөбэйдээн, иһиттэргэ көһөрөн түбүгүрэ сылдьаллар.
-Кыргыттар олус сүрэхтээхтэр, үлэһиттэр. Арассаадаларын улаатыннартаан, иһиттэргэ көһөртөөн атыылаан эрэллэр, — диэн салайааччылара Зинаида Иванова кэпсиир. Кыргыттар атыылара хамаҕатык барар, онон сыралаах үлэ үтүө түмүктэрдээх буоларыгар эрэнэбит. Ким үлэлиир — ол дохуот аахсан туһа дьоно буолаллар, бастыҥ хаһаайка үөрүйэхтэригэр уһуйуллаллар.
Күндү Сунтаар олохтоохторун уонна ыалдьыттарын Сунтаардааҕы оҕо дьоҕурун сайыннарар киин «Росток” эдэр оҕуруотчуттарын арассаадаларын — оҕурсу, помидор, минньигэс биэрэс араас суортарын, ону таһынан львиный зев, цинерария, циния, виола, декоративнай подсолнух, астра, петушиный гребешок сибэккилэри сөбүгэр сыанаҕа кэлэн атыылаһыҥ, өлгөм үүнүүнү ылан дьиэ кэргэҥҥитин үөрдүҥ. Айна Яковлева.
