Сайын кэлэн бэлэһэппиэттээх дьон элбээтэ. Онуоха сэрэхтээх буоларга үөрэтэр ааксыйа Сунтаарга тэрилиннэ.
Ленин Болуоссатыгар Сунтаар нэһилиэгин дьаһалтата «Харысхал» ДНД-ны кытта «Куттала суох бэлэһэппиэт» диэн тэрээһин ыыттылар. Манна баҕалаах оҕолор, улахан дьон кэлэн бэлэһэппиэтинэн күрэскэ холоннулар.
«Харысхал» ДНД бу сыллар усталарыгар нэһилиэнньэҕэ үөрэтэр, сэрэтэр үлэни кыайа-хото тутан үлүгэрдээх тэрээһини ыытар. Салайааччы Надежда Макарова: «Бу тэрээһин Дьиэ кэргэн декадатын чэрчитинэн ыытыллар, быйыл бастакытын тэриллэр, күрэс үс түһүмэхтээх, теория уонна практика»,- диэн билиһиннэрдэ.
Тэрээһиҥҥэ ГАИ үлэһитэ Артём Едисеев бэлэһэппиэт миинэргэ быраабыланы иһитиннэрдэ, суолга сэрэхтээх буоларга ыҥырда.
Манна күрэсчиттэр пазл таҥан суол бэлиэтин быһаардылар, змейкалаан, туормастаан да ыллылар. Бүтэһик түһүмэххэ күргэни туораатылар.
10 оҕону кытта икки кэрэ аҥаар кытынна. Онтон биирдэстэрэ күннэтэ бэлэһэпптэтинэн сылдьар Анна Чойнова. Кини бу маннык тэрээһиннэр элбэххэ үөрэтэллэр диэн санаатын үллэһиннэ.
Бэлэһэппиэти ким баҕарар, хаһан баҕарар миинэн сөп, ол эрээри суолга сэрэхтээх буолууну хайаан да тутуһуҥ.
Тускулаана ГОРОХОВА-КОБЕЛЬЯНОВА
