Оҕо көмүскэлин күнүн ураты уонна олус интэриэһинэй көстүүтүнэн футбол матча буолан ааста. Бу күн күүстээх киирсиигэ эр дьон уонна оҕолор хамаандалара күөн көрсүстүлэр.
Улахан дьон түмсүүлээх хамаандатын улуус баһылыгын имиджевай политикаҕа солбуйааччыта Мирослав Иванов тэрийэн таһаарда. Оттон эдэр кэскиллээх спортсменнар хамаандаларын лицей физкультураҕа учуутала Тимур Тимофеев өрө көтөҕөн уонна бэлэмнээн киллэрдэ.
Күүстээх күрэх түмүгүнэн, эдэр футболистар улахан дьону баһыйан, чаҕылхай кыайыыны ситистилэр! Кыайыылаахтар үөрүүлэрэ муҥура суох, минньигэс бэлэхтэринэн наҕараадаланнылар.
Манна даҕатан эттэххэ, оҕолор футбол спорт көрүҥүн олус сөбүлүүллэр. Киэҥ, күөх стадиоҥҥа күн ахсын мустан, күүстэрин-уохтарын харыстаабакка мээчик тэбэллэр, дьарыктаналлар. Бу курдук успуордунан үлүһүйүү оҕо доруобуйатын бөҕөргөтөр, хамаанданан үлэлииргэ үөрэтэр уонна олоххо ситиһиилээх буоларга кынаттыыр. Маны барытын биһиги эдэр спортсменнарбыт бүгүҥҥү кыайыыларынан өссө төгүл туоһулаатылар.
_Сунтаар улууһун дьаһалтатын пресс-сулууспата_
