Сарсыарда 11.30 чаастан «Алмаз» стадиоҥҥа оҕо аймах, дьон-сэргэ түмсэн оҕо күнүн бэлиэтээн араас түһүлгэ төрүттэннэ. Ол иһигэр Ийэ тыл түмсүүтэ «Саха тылын бил, куубугу түргэнник хомуй» диэн оонньууну өрө туттубут. Манна Марианна Поскачина чороонтон саҕалаан киһи илиитигэр, бэгэччэгэр, ытыһыгар тиийэ көрдөрөн таайтарда. Таайбыт оҕолор тутатына Маар Күөлтэн төрүттээх Владимир Емельянов «Түргэн куб» оонньуутугар холонон 50 куубугу бириэмэҕэ хомуйдулар. Манна 35 оҕо кыттыыны ылан кыайыылааҕынан 30,38 сөк. хомуйбут 12 саастаах Вика Игнатьева буолан «Сунтаар — ОЛОҤХО дойдута» дьаралыктаах үрүксээги, уу иһэр бытыылка бирииһи тутта. Бу оонньуубутугар бирииһинэн көмө буолбут Александра Павловаҕа, Алёна Сергееваҕа, Изабелла Жирковаҕа барҕа махтал.
БЭЛИЭТЭЭҺИН: Доҕоттор, оҕолорбут сахалыы элбэх тылы билбэттэр эбит, бэл *мурун* диэҥҥэ күчүмэҕэйдэри көрүстүбүт, нууччалыы бэркэ этэллэр, онтон сахалыы?!
Хата оҕолорун бу оонньууга аҕалбыт төрөппүттэр ыччаттара билбэттэрин көрөн бэркиһээн бардылар, арааһа мантан ыла оҕолорун сахалыы тылга үөрэтиэхтэрэ диэн эрэнэбит. Онтон биир үөрдэрэ үгүс оҕо сахалыы ааттаахтар Сайдам, Эрчим, Айсиэн, Эрхаан, Арылхан, Байдам, Мургун, Айаал, Айыына, Сандаара, Мичийэ, Сахайаана биһиги оонньуубутугар кытыннылар. Сахалыы билиэхпит диэн мэктиэ тылларын этэн бардылар.
Бу сэргэх оонньууну тэрийсибит Ийэ тыл кэскилин салайааччытыгар, биир санаалаахпар Марианна Поскачинаҕа барҕа махтал.
Ийэ тыл салайааччыта Тускулаана ГОРОХОВА-КОБЕЛЬЯНОВА
Бэс ыйын 1 күнэ, 2026 сыл.
