Сунтаар улууһун үөрэҕириитин управлениетын аатыттан Аан дойдутааҕы Оҕо көмүскэлин күнүнэн итиитик-истиҥник эҕэрдэлиибин! Хас биирдии ыал дьоло – оҕо. Оҕо баар буолан сир киэркэйэр, үдьуор утума салҕанар. Сунтаар улууһун кэскиллэрэ, инникилэрэ-оҕолор. Кустук өҥнөрүнэн тырымныыр дьоллоох оҕо саас-кэрэ умнуллубат кэм буолар. Биһиги сорукпут-оҕолорбутугар бастыҥ усулуобуйаны олохтооһун, кинилэри быраап өттүнэн көмүскээһин, доруобуйалара чэгиэн буоларыгар кыһаллыы, этэҥҥэ сылдьалларын туһугар кыһамньы. Саха сирин үүнэр кэскилэ, көлүөнэлэр быстыспат ситимнээх утумнара, кэнчээри ыччат иитиититтэн-үөрэҕиттэн улахан тутулуктаах. Олоҥхо дойдута-Сунтаар улууһун кэскиллэрэ-оҕолор-чөл куттаах, сиэр-майгы уонна үөрэх-билии өттүнэн үрдүк таһымнаах буолалларыгар, олох киэҥ аартыгар бигэтик тирэхтэнэн үктэнэллэригэр төрөппүттэр, педагогтар уонна общественность түмсэммит салгыы ситимнээхтик үлэлиэхтээхпит.
Күндү оҕолор! Баҕарабын бу сырдык, кэрэ бырааһынньык күн үгүс үөрүүнү-көтүүнү, чаҕылыҥнас күннээх ыраас күөх халлааны, дьоллоох оҕо сааһы, дьиэ кэргэттэргитигэр ил-эйэ эҥэрдэстин!
Сунтаар улууһун үөрэҕириитин управлениетын салайааччыта Б.Н.Васильев
Күндүттэн күндү оҕолорбут – улууспут инники Эрэллэрэ уонна Кэскиллэрэ!
«Сунтаар улууһа (оройуона)» муниципальнай оройуон дьаһалтатын, улуус(оройуон) депутаттарын Сэбиэтин уонна тус бэйэбит ааппытыттан аанньал курдук сып-сырдык, кып-кырачаан, оторой-моторой оҕолорбутун үтүө, сырдык, кэрэ бырааһынньыгынан – Аан дойдутааҕы Оҕо көмүскэлин күнүнэн итиитик-истиҥник эҕэрдэлиибит!
Дьиэ кэргэн төрдүн-ууһун салҕааччы – оҕо. Оҕо баар буолан олох салҕанар. Оҕо күөрэгэй чыычаах дьирибинии ыллыырыныы, күн курдук күлүмүрдүү күлэрэ биһиэхэ туохтааҕар да күндү буолар. Олохпутун салгыыр биһиги оҕолорбутугар төһө кыалларынан дьоллоох оҕо сааһы хааччыйар — биһиги барыбыт ытык иэспит. Дойду инники кэскилэ, норуот өлбөт-сүппэт утума, хайдах буолара кини ыччата хайдаҕыттан улахан тутулуктааҕын өйдүүбүт. Ол иһин үүнэр колүөнэ кэнэҕэски ыччаппытын чөл куттаах иитэн-такайан, олох суолугар үктэннэрэр, оҕону сайыннарарга уонна сөптөөхтүк иитэргэ улахан эппиэтинэһи сүгэн бары кыһаллыах тустаахпыт.
Күндү оҕолор! Өссө төгүл эҕэрдэлээн туран,бу бырааһынньык күн эһиэхэ ситиһиилэри, үгүс үөрүүнү-көтүүнү, олоххут суола остуоруйа кэрэ дойдутун курдук, аһаҕас, сылаас, сырдык буоллун! Үтүөҕэ, кэрэҕэ, үрдүккэ дьулуһуугут хаһан да уҕараабатын. Барыгытыгар дьоллоох оҕо сааһы баҕарабыт!
Сунтаар улууһун баһылыга А.В. Григорьев
Сунтаар улууһун депутаттарын Сэбиэтин бэрэссэдээтэлэ У.Д. Попова
