Манна уопсайа 6 хамаанда бизнес-былаан оҥорон экспертнэй хамыыһыйа иннигэр көмүскээтилэр. Уолаттар ааҕыыларын Тойбохой оскуолата 2010 сылтан тэрийэн ыытар.
Бүгүҥҥү дьыалабыай оонньуу оскуола биир киэн туттар выпускнигар Михаил Романович Леонтьев сырдык аатыгар ананна. Кини оскуола бастыҥ үөрэнээччитэ, уолаттартан бастакы медалист, спортсмен, уопсастыбанньык. Михаил Леонтьев олоҕо, үлэлээбит үлэтэ үөрэнээччилэргэ үтүө холобур буолар.
Дьүүллүүр сүбэ састаабыгар Ефремова Ия Александровна — Сунтаар улууһун экономическай сайдыыга управлениетын салайааччыта; Спирова Мария Валентиновна — Сунтаар улууһун экономическай сайдыыга управлениетын исписэлииһэ; Васильев Борис Николаевич — Сунтаар улууһун үерэҕин салалтатын салайааччытын солбуйааччы; Егоров Станислав Васильевич — Тойбохой нэһилиэгин баһылыга; Тотонов Айаал Валерьевич — Тойбохой оскуолатын дириэктэрэ киирдилэр.
Дьыалабыай оонньуу кыттыылаахтара рыногы ырыттылар, бородууксуйа конкурентноспособноһын үөрэттилэр. Ону тэҥэ тэрилтэлэр үлэлэрин, үп-харчы быһаарыытын хайдах ылыналларыгар туох дьайыылары оҥороллорун, туох фактордар хайдах үлэлииллэрин өйдүүллэригэр көмөлөстө.
Хас биирдии хамаанда бэйэтин бырайыагын билиһиннэрдэ. Экспертэр кыттааччыларга бэйэлэрин күүстэрин, мөлтөх өрүттэрин үчүгэйдик өйдүүллэригэр көмөлөстүлэр.
Бизнес-былааннары көмүскээһин кэнниттэн экспертэр түмүк таһаардылар. Ол курдук күрэх түмүгүнэн:
«Лучшая презентация» анал аат — Аллыҥа орто оскуолата, бырайыактара «ЭкоЛайф»; «Лучшая бизнес-идея» — Аллыҥа орто оскуолата, «Мобильная точка по продаже холодных напитков из лимона и брусники»; «Лучшее обоснование» — Арыылаах орто оскуолата, бырайыактара «Георгий и его команда».
3-үс истиэпэннээх диплом Сунтаардааҕы лиссиэй хамаандатыгар ананна, бырайыактара «Квест — комната»;
2-ис истиэпэннээх диплом — Дьаархан орто оскуолатыгар, «Зеленые возможности» бырайыак;
Кыайыылаах үрдүк аатын Тойбохой орто оскуолатын хамаандата ылла, бырайыактара «Хочо оҥоһуктара».
Бастыҥ хамаандалар грамотанан, биһирэбиллээх бириистэринэн бэлиэтэннилэр. Ону таһынан Михаил Леонтьев аймахтара туруорбут анал бириэмийэтин туттардылар.
Улуустааҕы дьыалабыай оонньуу бары өттүнэн интэриэһинэй, үөрэнээччилэри сайыннарар көдьүүстээх ньыманан буолла. Кыттааччылар саҥа билиини эрэ буолбакка, дьоҕурдарын салгыы сайыннарарга кыах ыллылар.
