“Точка роста” – федеральная сеть центров образования цифрового и гуманитарного профилей.

Балаҕан ыйын 24 күнүгэр “Современная школа” федеральнай бырайыак чэрчитинэн Сунтаар улууһугар А.П.Павлов аатынан Сунтаар бастакы нүөмэрдээх оскуолатыгар уонна политехническай лицей- интернат “Ай-сатаа” технопаркатыгар “Точка роста” диэн цифровой уонна гуманитарнай хайысхалары үөрэтэр федеральнай ситим кииннэрин үөрүүлээх аһыллыылара буоллулар. Ол курдук, А.П.Павлов аатынан Сунтаар бастакы нүөмэрдээх оскуолатыгар үөрүүлээх тэрээһиҥҥэ кыттыыны ыллылар Сунтаар улууһун баһылыгын солбуйааччыта Еремеев Г.М., Сунтаар улууһун үөрэҕириитин управлениятын начальнигын солбуйааччыта Васильева Е.Д. Гаврил Михайлович,Елена Дмитриевна “Точка роста” цифровой уонна гуманитарнай хайысхалары үөрэтэр киин аһыллыбытынан үөрэнээччилэри, учууталлары,
төрөппүттэри эҕэрдэлээтилэр. Инникитин билиҥҥи информационнай технологиялары туһанан үөрэхтэригэр,
үлэлэригэр чиҥ билиини, үрдүк ситиһиилэри, дьоҕурдарын,
сатабылларын сайыннаралларыгар баҕардылар. “Точка роста” киин материальнай -техническай өттүнэн хааччыллыыта аныгы үөрэх ирдэбилигэр эппиэттиир. “Современная школа” федеральнай бырайыак сыала Россия 2024 сылга Аан дойдуга үөрэҕирии сайдыытыгар 10 бастыҥ дойдулар истэригэр киирэрин ситиһии буолар. Ити бырайыак чэрчитинэн Россияҕа быйыл,2019 сылга, 50 регион 2049 оскуолаларыгар “Точка роста” кииннэр аһыллаллара былааннаммыт. Саха сиригэр 34 улуус 54 нэһилиэктэрин оскуолаларыгар “Точка роста” кииннэр үлэлэрин саҕалыахтаахтар. Ол иһигэр, Сунтаар улууһугар икки итинник кииннэр үлэлэрин саҕалааннар аныгы кэм үөрэҕириитин сайдыытыгар олук уурдулар. Информатика, технология,ОБЖ предметтэри чиҥэтэн үөрэтиигэ болҕомто ууруллуохтаах. Оҕолору шахматка дьарыктар умсугутуохтаахтар. Маннык кииннэр оскуола иһинэн аһылланнар тыа оскуолаларын үөрэнээччиллэрин эмиэ үөрэтиэхтээхтэр. “Точка роста” киин үлэлээтэҕинэ оскуола үлэтин материальнай-техническай хайысхатыгар билиҥҥи кэм ирдэбилинэн цифровой,техническай,гуманитарнай программалары үөрэтиигэ аналлаах саҥатытыы үлэтэ барыахтаах, дистанционнай үөрэхтээһин уонна сетевой көрүҥ сайдыахтаахтар.

Сунтаар улууһун үөрэҕириитин управлениятын информационнай- методическай отдела.

Добавить комментарий