Олунньу ый устата Арассыыйа бары регионнарыгар «Биир кэлим судаарыстыбаннай эксээмэни төрөппүттэр туттарар күннэрэ» акция ыытыллар.
Акция чэрчитинэн Сунтаар улууһун үөрэх тэрилтэлэригэр быйыл оскуоланы бүтэрэр үөрэнээччилэр төрөппүттэрэ оҕолорун кытары миэстэлэрин атастаһан, металлодетектары ааһан, сорудахтары толорон, түмүгүн истээһинигэр тиийэ биир кэлим судаарыстыбаннай эксээмэн буолар бэрээдэгин кытары билсэллэр.
Бу акцияҕа төрөппүттэр сүрүннээн тугу кытары билсиэхтэрэй:
— биир кэлим судаарыстыбаннай эксээмэҥҥэ хайдах бэлиэтэнии ааһалларын уонна аудитория иһигэр киирэн олороллоро хайдах ньыманнан барарын;
— ЕГЭ туттарааччылар үлэлиир остуоллара хайдах буолуохтааҕын;
— эксээмэн буолар миэстэтигэр (ППЭ) хонтуруоллуур-кээмэйдиир матырыйааллары (КИМ) бэчээттээһин уонна сканердааһын процеһын;
— история предметигэр биир кэлим судаарыстыбаннай эксээмэн 2020 с. хонтуруоллуур-кээмэйдиир матырыйаала (КИМ) хайдах ис тутуллааҕын уонна дьүһүннээҕин.
Маннык акция сүрүн сыала – төрөппүттэргэ биир кэлим судаарыстыбаннай эксээмэн хайдах бэрээдэгинэн барарын билиһиннэрии. Ону таһынан, төрөппүттэргэ уонна үөрэнээччилэргэ биир кэлим эксээмэнтэн долгуйбакка сөпкө дьаһанан бэлэмнэнэллэригэр уонна эппиэтинэстээхтик сыһыаннаһар буолалларыгар ыҥырар, көмөлөһөр.
