Сэтинньи 22-24 күннэригэр Дьокуускай куоракка саха тылын, литэрэтиирэтин уонна култууратын учууталларын ll-с өрөспүүбүлүкэтээҕи сийиэһэ буола турар
Быйылгы сийиэс Саха АССР төрүттэммитэ 100 сылыгар, саха суругун-бичигин төрүттээччи С.А.Новгородов төрөөбүтэ 130 сылыгар уонна тыллар тустарынан сокуон ылыллыбыта 30 сылын көрсө буолла. Сийиэс сүрүн сыала Саха Өрөспүүбүлүкэтигэр саха тылын сайыннарыы, федеральнай судаарыстыбаннай үөрэх ыстандаартарын тиһигэр киллэрэн төрөөбүт тылбытын, литэрэтиирэбитин уонна култуурабытын үөрэтии ис хоһоонун, хаачыстыбатын үрдэтии туһунан дириҥ ис хоһоонноох кэпсэтиини тэрийии, сүбэлэһии, инники үлэлиир хайысхалары торумнааһын буолар.Сунтаар улууһуттан барыта холбоон 19 дэлэгээт кыттыыны ыла сылдьабыт.Сийиэс маҥнайгы күнүгэр Саха Өрөспүүбүлүкэтин Ил Түмэнигэр сийиэс дэлэгээттэрин кытта көрсүһүү буолан ааста. Бу көрсүһүү «Саха Өрөспүүбүлүкэтигэр тыллар тустарынан» сокуон 30 сылыгар ананна.
Онтон салгыы ИРОПК дьиэтигэр СӨ ааҕыы сылыгар анаммыт литературнай салон ыытылынна. Кэлбит ыалдьыттары институт үлэһиттэрэ сылаас алаадьынан үөрэ-көтө көрүстүлэр. Тэрээһини саха тылын учууталларын түмсүүтүн салайааччы Барашкова Ж.Ф. ыытта.
Литэрэтииринэй солуону ИРОПК дириэктэрэ Н.М.Павлов норуодунай бэйиэтэ Семен Данилов »Саха саҥата» хоһоонун ааҕан аста. Ыалдьыт быһыытынан норуот поэта И.В.Мигалкин, норуот суруйааччылара С.А.Попов-Тумат, Н.В.Михалева-Сайа, прозаик А.Е.Варламова-Айысхаана ыҥырыллан сырыттылар. Кинилэргэ улуустарын дьоно сибэкки дьөрбөтүн туттардылар. Саха тылын учууталлара 80-тан тахса киһи сырытта. Дьокуускай куорат 1 N-дээх оскуолатыттан »Тыыннаах тыл» үөрэнээччилэр бөлөхтөрө кэлэн уус-уран ааҕыыны иһитиннэрдилэр, ырыа ыллаатылар. Оттон 7-с N-дээх оскуола оҕолоро Д.К.Сивцев-Суорун Омоллоон »Сайсары» драматыттан быһа тардыыны көрдөрдүлэр.
»Айар» кинигэ кыһатын редактора О.А.Янцен кэлэн, кинигэ оҥоруутугар саҥа сыыппара технологиятын туһунан кэпсээтэ.
»Үрдэл» паарка арт-директора Николь Егорова саха чулуу дьонун мэтириэттэрэ уонна кэс тыллара суруллубут халандаарын таһаарбыттарын туһунан кэпсээтэ, ыалдьыт суруйааччыларга бэлэх уунна.
»Аныгы кэм уонна ааҕыы туһунан» диэн тиэмэҕэ суруйааччылар уонна учууталлар истиҥ кэпсэтиилэрэ өргө диэри тардылынна. Учууталлар суруйбут хоһооннорун ааҕан иһитиннэрдилэр.
Маны таһынан доруобуйаларынан хааччахтаах оҕолорго фольклор көрүҥнэрин үөрэтии маастар кылааһыгар сырыттыбыт. Аны саха национальнай библиотекатыгар «Саха Өрөспүүбүлүкэтин судаарыстыбаннай уонна дьиҥ таһымнаах тылларын виртуальнай түмэлэ» бырайыак сүрэхтэниитэ буолан ааста. Манна өрөспүүбүлүкэбит араас муннуктарыттан төрөөбүт тыл, култуура учууталлара, тыл үнүстүүтүн идэлээхтэрэ, национальнай бибилэтиэкэ үлэһиттэрэ кыттыыны ыллыллар. Бу тэрээһиҥҥэ түмэл үлэтин, хайысхаларын туһунан кэпсээтилэр. Куйаар ситиминэн үлэлиир мусуой салааларын билиһиннэрдилэр.
Бу тэрээһин түмүгэр 100тэн тахса учуутал VIP ааҕааччы билиэтин ылар чиэскэ тигистэ.
Маны сэргэ НВК көрдөрөр-иһитиннэрэр хампаанньа сийиэскэ аналлаах биэриитигэр кыттыыны ыллыбыт.
Бүгүн Саха тыйаатыр киэҥ уораҕайыгар сийиэс үлэтин салҕыыр. Ил Дархан А.С. Николаев сахабыт тыла сайдыытыгар 100 мөлүйүөн көрүллүө диэн этиитэ барыбытын үөртэ. Феодосия Васильевна саха тылын, литературатын кэбиниэтэ эрэ буолбакка, оскуола аайы лаборатория баар буолуо диэбитэ олус кэрэхсэбиллээх. Мантан салгыы түмүк докумуоннары ылыныы күүтүллэр.
Любовь Семеновна Никифорова, Л.А.Попов аатынан Арыылаах оскуолатын учуутала, завуһа.
