Бүгүн Сахабыт сирин үрдүнэн Төрөөбүт тыл уонна сурук-бичик күнүгэр «Саха тылын уонна литэрэтиирэтин бастыҥ учуутала» диэн иккис улуустааҕы куоҥкурус буолан ааста. Манна улууспут араас оскуолаларыттан биэс талааннаах учуутал кыттыыны ылла. Бу тэрээһин биһиги култуурабыт нэһилиэстибэтин харыстыыр уонна сайыннарар дьону түмтэ.
Күрэс аһаҕас уруоктары ыытыыттан саҕаланна, онно хас биирдии кыттааччы бэйэтин ураты ньыматын көрдөрдө. Уруоктар интэриэһинэй ис хоһоонноох, интерактивнай оонньуулаах аастылар, учууталлар үөрэнээччилэргэ саҥа билиилэри-көрүүлэри арыйдылар.
Ол кэнниттэн «Методическай мастарыскыай» диэн түһүмэх буолла. Манна кыттааччылар бэйэлэрин педагогическай уопуттарын үллэһиннилэр. Бу түһүмэх идеялары атастаһарга, саҥа методическай матырыйааллары уонна бэйэ бэйэни хардарыта көҕүлээһиҥҥэ туһуламмыт былаһаакка буолла. Учууталлар бэйэлэрин маастарыстыбаларын уонна идэтийиилэрин таһымын көрдөрдүлэр.
Түмүккэ Улуус баһылыгын социальнай боппуруостарга уонна имиджевай политикаҕа солбуйааччы Гаврил Еремеев биһиги национальнай идентичноспытын харыстааһыҥҥа Саха тылын уонна литэрэтиирэтин учууталлара оруолларын тоһоҕолоон бэлиэтээтэ. Кини куоҥкурус хас биирдии кыттааччы бэлэмнэниитин үрдүк таһымын бэлиэтээтэ уонна кинилэр эппиэтинэстээх үлэлэригэр салгыы ситиһиилэри баҕарда. Ону тэҥэ кыттааччыларга Сунтаар улууһун Аҕа баһылыгын Анатолий Григорьев Махтал суругун туттарда.
Куоҥкурус муҥутуур кыайыылааҕынан Маар-Күөл оскуолатын учуутала Евдокия Юрьевна Мыреева буолла. Киниэхэ «Кылаан кыайыылаах» Добун сурук туттарылынна. I үрдэл сурук Сунтаардааҕы политехническэй лиссиэй учууталыгар Сахайа Николаевна Павловаҕа туттарылынна. II үрдэл – Кэмпэндээйи оскуолатын учууталыгар Нарыйа Егоровна Кондратьеваҕа, III үрдэл – Сиэйэ орто оскуолатын учууталыгар Марина Владимировна Хомподоеваҕа. Ону таһынан, Сахайа Павловаҕа «Оҕо биһирэбилин ылбыт учуутал» анал аат иҥэрилиннэ.
Бу курдук, улуустааҕы «Саха тылын уонна литэрэтиирэтин бастыҥ учуутала» күрэс быһыытынан биир идэлээхтэри түмэр дьаһал эрэ буолбакка, норуоппут култууратыгар уонна тылыгар-өһүгэр аналлаах сүрүн тэрээһин буолла. Маннык куоҥкурустар учууталлар ситиһиилэрин бэлиэтииргэ уонна көҕүлүүргэ эрэ буолбакка, саҥа көлүөнэни үөрэтиигэ, бэйэбит нэһилиэстибэбитигэр тапталы үөскэтэргэ көмөлөһөллөр.
