Бүгүн Сунтаар улууһун үөрэҕин үлэһиттэрин Олунньутааҕы сүбэ мунньаҕа «Проблемы и перспективы развития муниципальной системы образования» диэн темалаах Сунтаар А. П. Павлов аатынан 1 нүөмэрдээх оскуолатыгар ыытылынна.
Бастатан туран мунньах кыттыылаахтарын улуус баһылыга Анатолий Григорьев эҕэрдэлээтэ. Ол кэннэ үөрэх салалтатын салайааччыта Альберт Иванов сүрүн дакылаады оҥордо. Манна үөрэх эйгэтигэр тирээн турар кыһалҕалары сырдатта. Кадр тиийбэтин-түгэммэтин уонна оҕо саадтарын хааччыйыыга ураты болҕомто ууруллуохтааҕын бэлиэтээтэ. Ону сэргэ бу уобаласка үлэлии сылдьар педагогтарга аналлаах сэминээрдэри ыытыы суолтаталааҕын бэлиэтээтэ.
Алексей Иванов, уопсай үөрэхтээһин отделын салайааччыта, «Подготовка к ГИА» теманы таарыйда. Быйыл 376 оҕо БКЭ туттарыахтара. Ону таһынан Алексей Иннокентьевич «Азия о5олоро» омуктар икки ардыларынаа5ы спорт оонньууларыгар уонна үөрэнээччилэр спартакиадаларыгар барар о5олору биир кэлим экзаменнарын эрдэ туттарыыны хааччыйыыга бэлэмнээһин дьоһуннаах сорук буоларын эттэ.
Александра Васильева, иитии уонна эбии үөрэхтээһин отделын сэбиэдиссэйэ, «Основные аспекты воспитания: перспективы развития» диэн темалаах дакылаадын билиһиннэрдэ. Оскуолаларга театрдар уонна музейдар аһыллыбыттарын иһитиннэрдэ. Александра Алексеевна успуорт саалалар тиийбэттэрэ биир тирээн турар кыһалҕа буоларын биллэрдэ.
Ону тэҥэ Захарова Нина, Сунтаардааҕы политехническэй лиссиэй 10 кылааһын үөрэнээччитэ, бүтүн россиятааҕы оҕолор иккис съездтарыгар баран кыттан кэлбитин кэпсээтэ. Салҕыы Ангелина Антонова, М. Родионова аатынан оҕо дьоҕурун сайыннарар киин сэбиэдиссэйэ, МОЦ (муниципальнай опорнай центр) хамсааһын үлэтин билиһиннэрдэ. Альбина Прокопьева Тойбохойдооҕу детдом профилактика отделын салайааччыта оҕо иитиитин туһунан кэпсээтэ.
Ити курдук, олунньутааҕы Сунтаар улууһун үөрэҕин үлэһиттэрин сүбэ мунньаҕын пленарнай чааһыгар муниципальнай тэриллии кыһалҕаларын уонна кэскиллэрин кытта сибээстээх араас аспектары дьүүллэстилэр.
Мунньах бүтүүтэ Сунтаар улууһун үөрэҕин сайдыытыгар тус кылааттарын, өр сыллаах үрдүк таһаарыылаах үлэлэрин иһин ытык дьоммутун наҕараадалааһын үөрүүлээх сиэрэ-туома ыытылынна. Кинилэр ситиһиилэрэ бэлиэтэннилэр. Ону таһынан, өр сылларга үөрэх салалтатыгар үлэлээбит Екатерина Попованы бочуоттаах сынньалаҥҥа атаарыы тэрээһинэ буолла. Екатерина Попова үтүө суобастаах үлэһиттэртэн биирдэстэрэ. Бүгүн кини үлэтин-хамнаһын, ситиһиилэрин бэлиэтиибит уонна инники кэскилбит өссө үрдүк үөрүүнү, саҥа кыахтары аҕалыа диэн эрэнэбит.
Күн иккис аҥарыгар үөрэх салаатын үлэһиттэрин Олунньутааҕы мунньаҕын чэрчитинэн сессиялар үс былаһааканан арахсан ыытылыннылар. Педагогтар түмсэн инники соруктарын торумнастылар, сүрүн боппуруостары быһаарыстылар.
