Олунньу 16 күнүгэр Сиэйэ култууратын дьиэтигэр РФ уопсай үөрэхтээһин бочуоттаах үлэһитэ, «Саха Өрөспүүбүлүкэтин учууталларын учууталлара», М.Н. Анисимов аатынан Сиэйэ орто оскуолатын дириэктэри иитэр-үөрэтэр үлэҕэ солбуйааччынан өр сылларга үлэлээбит Зоя Георгиевна Павлова 70 сааһыгар аналлаах «Үлэҕэ анаммыт олох” кинигэтин сүрэхтэниитэ буолан ааста. Кинигэ ааптара Сиэйэ нэһилиэгин кыраайы үөрэтэр «Утум” түмэлин салайааччыта Октябрина Прокопьевна Максимова буолар.
Дьоро киэһэни ааптар «Ийэҕэ махтал» хоһоонунан аста. Бары ийэлэрбитин санаан, махтанан сүһүөхпүтүгэр туран иһиттибит. Баһылык Александр Романов: “Олорор сирин киһи киэргэтэр, бу сиргэ киһи туох эрэ аналлаах кэлэр» — диэн бэрт дириҥ ис хоһоонноох этиитэ Октябрина Прокопьевна үйэтитиигэ үрдүк аналын толоро сылдьарын аһаҕастык кэрэһилиир. Оскуола директора Федот Чыбыков үтүө-мааны дьоннорбутун историяҕа хаалларан иһиэххэ диэн бэрт чуолкайдык судургутук ыйда.
Ахтыы киэһэтигэр Зоя Георгиевна коллегалара, бииргэ үөрэммит үөлээннээхтэрэ, чугас аймахтара уонна нэһилиэгин олохтоохторо кыттыыны ыллылар. Мустубут дьон биир биир тахсан Зоя Георгиевна туһунан иһирэх санааларын үллэстэн, олохторун араас кэрдиистэригэр буолан ааспыт түгэннэрин ахтан-санаан аастылар. Ону таһынан улахан махталларын кинигэ ааптарыгар Октябрина Прокопьевнаҕа эттилэр.
Үөрэх сайдыытыгар үлэлэспит дьоммутун кэриэстээһин – биһиги ытык эбээһинэспит. Кинигэ сүрэхтэниитэ улууспут олоҕор бэлиэ суолталаах түгэнинэн буолла.
