Сунтаар улууһугар ааспыт сыл төрөөбүт тыл сылын чэрчитинэн «Төрөөбүт төрүт тыл түһүлгэтэ» улуустааҕы бырайыак үлэлээтэ. Бырайыак тэрийээччилэрэ: Сунтаар улууһун үөрэҕин салалтата (начальник Альберт Иванов), «Матери России» түмсүү Сунтаардааҕы салаата (Дария Григорьева), Сунтаардааҕы технологическай колледж (Гаврил Михайлов). «Төрөөбүт төрүт тыл түһүлгэтэ» бырайыак сүрүн сыала: төрөөбүт төрүт тылбытын үүнэр көлүөнэҕэ иҥэрии. Төрөөбүт төрүт тылга, сахалыы литератураҕа тапталы иҥэрии, сахалыы айымньылары ааҕыыга интэриэһи үөскэтии, Сунтаар улууһуттан төрүттээх суруйааччылар, поэттар айымньыларын үүнэр ыччакка тарҕатыы, кинилэр айар үлэлэрин билиһиннэрии, төрөөбүт улуус историятын үөрэтиигэ-чинчийиигэ интэриэһи үөскэтии, бырайыак тула нэһилиэнньэ сомоҕолоһон үлэлээһинин тэрийии бырайыак соруктарынан буолаллар.
Сунтаар улууһун 21 нэһилиэгиттэн үөрэҕирии хайысхатыттан 28 оскуола уонна Сунтаардааҕы технологическай колледж кытыннылар. Бырайыак чэрчитинэн саха тылыгар аналлаах араас хабааннаах тэрээһиннэр ыытылыннылар: сахалыы тылынан улуустааҕы ааҕыы марафона «Тыл — норуот баайа», викториналар, тыл оонньуулара, олоҥхо ааҕыылара, библиотечнай уруоктар, сахалыы хоһоон түһүлгэлэрэ, айар куттаах биир дойдулаахтарын олохторун уонна үлэлэрин чинчийии-үөрэтии уо.д.а. «Төрөөбүт төрүт тыл түһүлгэтэ» улуустааҕы бырайыак үлэтин түмүгүнэн дьүүллүүр сүбэ быһаарбытынан кыайыылаахтар билиннилэр.
Ол курдук, нэһилиэктэр ортолоругар: 1 миэстэ — Бордоҥ нэһилиэгэ (баһылык Константин Уаров), 2 миэстэ — Кутана нэһилиэгэ (Николай Давыдов), 3 миэстэ — Сунтаар нэһилиэгэ (Эдуард Филиппов). Оскуолалар ортолоругар: 1 миэстэ — Бордоҥ орто оскуолата (дириэктэр Михаил Максимов), 2 миэстэ-Кутана орто оскуолата (Владимир Архипов), 3 миэстэ — Сунтаардааҕы политехническай лицей-интернат (Олег Сосин). Педагог-бибилэтиэкэрдэр ортолоругар: 1 миэстэ — Анна Никитина (Бордоҥ орто оскуолата), 2 миэстэ — Изабелла Третьякова (Кутана орто оскуолата), 3 миэстэ — Антонина Гуляева, Антонина Егорова (Сунтаардааҕы политехническай лицей-интернат).
Ону таһынан анал номинациялар кыайыылаахтара: «Төрөөбүт төрүт тылы үүнэр көлүөнэҕэ бастыҥ уһуйааччы» — Мария Кондратьева (Сунтаар); «Айар куттаах биир дойдулаахтар ааттарын үйэтитии» номинацияҕа — Изабелла Третьякова(Кутана); «Үүнэр көлүөнэҕэ олоҥхоҕо, сахалыы төрүт үгэскэ аналлаах библиотечнай үлэ бастыҥ тэрийээччитэ» номинацияҕа — Анна Никитина(Бордоҥ); «Үүнэр көлүөнэҕэ сахалыы ааҕыыны бастыҥ тэрийээччи» номинацияҕа — Виктория Иванова (Күндэйэ), Саргылана Захарова (Сунтаар); «Төрөөбүт кыраай, саха тылын хайысхаларыгар бырайыак бастыҥ ааптара» номинацияҕа — Соломаида Федорова (Түбэй-Дьаархан); «Сахалыы хоһоону ааҕыыга бастыҥ ньымалар» номинацияҕа — Светлана Федорова, Анастасия Пахомова (Сунтаар).
Джулия АЛЕКСАНДРОВА, Сунтаар улууһун үөрэҕин салалтатын исписэлииһэ
