Муус устар 4 күнүгэр А. П. Павлов аатынан Сунтаар 1 нүөмэрдээх оскуолатыгар үөрэх салалтатын библиотечнай фонданы кытта үлэ салаатын сэбиэдиссэйинэн үлэлээбит Егорова Маргарита Яковлевна төрөөбүтэ 80 сылыгар аналлаах улуустааҕы «Педагог-библиотекарь 2024» куонкурус буолан ааста.
Маргарита Яковлевна олоҕо оҕолору кытта үлэҕэ, ааҕааччылары иитиигэ уонна библиотека дьыалатын сайыннарыыга анаммыта. Кини идэтийиитинэн уонна үлэтигэр бэриниитинэн педагогтарга уонна библиотекарь үгүс көлүөнэлэригэр холобур буолбута.
Бу күрэс библиотекарь оруолун үрдэтиигэ, кини үлэтин суолтатын бэлиэтииргэ, таһаарыылаахтык үлэлиир библиотекары көҕүлээһиҥҥэ ананан ыытылынна. Дьүүллүүр сүбэ састаабыгар үөрэх салалтатын информационнай-методическай отдел исписэлииһэ Джулия Александрова, Сунтаар киин библиотекатыттан Мария Алексеева, Саргылаана Генерова уонна СОШ №1 педагог-библиотекара Ирина Слепцова киирдилэр. Кыттааччылар үс түһүмэҕи аастылар. Ол курдук, бастакыга олус интэриэһинэй уруоктары ыыттылар, иккискэ видео нөҥүө бэйэни билиһиннэнии буолла, үһүскэ маастар-кылаас көрдөрдүлэр.
Улуустааҕы куонкурус биһиги уопсастыбабыт саҥа идиэйэлэринэн сайдыыга, тупсарыыга көҕүлүүр. Куонкуруска кыттааччылар уопут атастастастылар, үлэ саҥа ньымаларын үөрэттилэр. Билигин библиотекарь кинигэни эрэ баһылыыр буолбатах. Кини саҥа идиэйэлэри толкуйдуур уонна олоххо киллэрэр дьоҕурдаах буолуохтаах. Дьүүллүүр сүбэ санаатынан күрэхтэһии кыттыылаахтара айар, умсугутуулаах дьон буолалларын бигэргэттилэр.
Үс түһүмэх түмүгүнэн кыайыылааҕынан таҕыста Күүкэй орто оскуолатын библиотекара Наталья Фефелова, иккис бочуоттаах миэстэҕэ Сунтаардааҕы политехническэй лицей библиотекара Антонина Гуляева, үһүс миэстэҕэ — Туойдаах оскуолатын библиотекара Екатерина Тотонова. Маны таһынан «Лучший библиотечный урок» анал аат Дьаархан оскуолатын библиотекарыгар Юлия Гольдероваҕа ананна.
Куоҥкурус кыттааччыларыгар барыларыгар инники үлэлэригэр ситиһиилэри, профессиональнай үүнүүнү баҕарабыт.
