Алаһа дьиэ аайы
Ааҕыы киэһэтэ тэрилиннин,
Умнуллубут үгэспит
Үйэлэргэ салҕаныахтын.
Кинигэ – биһиги духуобунай баайбыт. Үйэлэргэ мунньуллубут өй-санаа барҕа баайын сомсубут ыччат олоххо тирэхтээх, толкуйа киэҥ, санаата бөҕөх, төрөөбүт дойдутун дьылҕатыгар ыалдьар, кыттыһар, олоҕу оҥорор, кэскиллиир кыах киниэхэ бэриллэр. Оҕону кинигэ диэки хайыһыннарыы – бу баар билигин оскуола уонна төрөппүт сүрүн соруктара.
Сэтинньи 10 күнүгэр Элгээйи орто оскуолатын бибилэтиэкэтигэр «Ааҕар дьиэ кэргэн — 2022» күрэс ыытылынна. Тэрээһин Саха Өрөспүүбүлүкэтигэр Дьиэ кэргэн сылыгар, Үөрэҕирии эйгэтигэр Ааҕыы сылыгар, Сунтаар улууһун кииннэммит библиотечнай ситимигэр Дьиэ кэргэнинэн ааҕыы сылыгар уонна “Ааҕыы түһүлгэтин Чорооно” тэрээһин чэрчитинэн ыытылынна. Тэрийээччилэр: Уйбаан Нуолур аатынан Элгээйи модельнай бибилэтиэкэтэ уонна К.Е. Иванов аатынан оскуола бибилэтиэкэтэ. Күрэс сыала-соруга: дьиэ кэргэнинэн ааҕыы иитэр суолтатын чиҥэтии, дьиэ кэргэнинэн ааҕыы үтүө үгэстэрин сөргүтүү, ааҕар дьиэ кэргэттэри өйөөһүн.
Күрэс «Төрөөбүт тылбыт төлө туппат төрүт баайбыт» бырайыак иһинэн 2018 сылтан 1-4 кылаас төрөппүттэрин, үөрэнээччилэрин икки ардыгар ыытыллар. Быйылгы күрэскэ барыта 5 дьиэ кэргэн кытынна: Алёна Коркина кыыһа Алисалыын, Матрёна Соколова уола Дималыын, Прасковья Антонова уола Артёмнуун, Алла Егорова уола Даниллыын, Вячеслав Сафонов уола Реастыын. Көхтөөх дьиэ кэргэттэр барыта 6 түһүмэххэ тургутууну аастылар: «Биһиги ааҕар дьиэ кэргэн», «Оруолунан ааҕыы», «Дьиэтээҕи сорудах», «Өрөспүүбүлүкэ историятыттан», «Поэтическай таайбараҥ», «Литературнай геройу ойуулааһынынан билиҥ».
Тургутукка ситиһиилээхтик кыттан «Ааҕар дьиэ кэргэн — 2022» ааты Коркиннар ыллылар, 2 миэстэ – Сафоновтар, 3 миэстэ – Соколовтар дьиэ кэргэн таҕыстылар. Бары кыттыбыт дьиэ кэргэттэргэ оскуола – минньигэс бириистэри, олохтоох бибилэтиэкэ – кинигэлэри бэлэх уунна. Аҕа оҕону иитиигэ улахан суолталаах, дьиэ кэргэҥҥэ дурда-хахха буолар, булааччы-талааччы диэн күрэскэ кыттыбыт биир аҕаны өйөөн, атын аҕалар үтүө холобур оҥостон, кэлэр күрэстэргэ көхтөөхтүк кыттыахтара диэн эрэнэн туран “Арассыыйа ийэлэрэ” түмсүү Вячеслав Сафоновка сэмэй бэлэх туттарда. Онтон кыайыылаах аатын ылбыт Коркиннар дьиэ кэргэн «Ааҕар дьиэ кэргэн — 2018» ааты ылбыт, дьиэ кэргэнинэн ааҕыыны өйүүр, көҕүлүүр урбаанньыт Эльвира Спиридонова туруорбут сүрүн бирииһин ылан үөрдүлэр-көттүлэр.
Күрэскэ кыттыбыт бары дьиэ кэргэттэргэ, кылаас салайааччыларыгар, кэлэн бииргэ үөрэнэр доҕотторугар ыалдьыбыт, өйөөбүт 1-4 кылаас үөрэнээччилэригэр, спонсордарга тэрийээччилэр ааттарыттан барҕа махталбытын тиэрдэбит. Эһигини кытары өрүү ил-эйэ эҥээрдэстин, доруобай, дьоллоох, кинигэ доҕордоох буолуҥ!
