Сүүс сыллааҕыта учуутал идэтин үксүгэр эр дьон баһылыыллар этэ. Ол курдук Я.А. Каменскай, А.С. Макаренко, К.Д. Ушинскай, В.А. Сухомлинскай, Ш.А. Амонашвили, С.Л. Соловейчик биллиилээх учууталлар, улахан буукубаттан суруллар талааннаах педагогтар ааттара үйэлэргэ умнуллубат.
Эр киһи-педагог, учуутал бу үрдүк анал. Түбэһиэх киһи оскуолаҕа уһуннук үлэлээбэт, оҕону, үөрэтэр предметин дьиҥнээхтик таптыыр, бэриниилээх киһи учуутал үрдүк аатын сүгэр кыахтаах. Эр киһи амарах аҕалыы сыһыанынан, бэйэтин холобурунан үөрэнээччини үтүөҕэ сирдиир аналлаах.
Быйыл дойдуга биллэриллибит Уһуйааччы уонна Аҕа сүбэһит сылын чэрчитинэн ССРС норуотун учуутала М. А. Алексеев аатынан «Учуутал – эр киһи идэтэ» диэн өрөспүүбүлүкэтээҕи 5-с үбүлүөйдээх күрэс Бүлүү куоракка уонна Халбаакы нэһилиэгэр ыытылынна. Күрэскэ өрөспүүбүлүкэ араас муннугуттан 64 сайаапка киирбититтэн сүүмэрдиир түһүмэҕи ааһан 20 эр киһи учуутал 15 улуустан кэлэн кытынна.
Икки күн устата учууталлар уруок, маастар-кылаас ыыттылар, бырайыак көмүскээтилэр. Социалистическай Үлэ Дьоруойа П.И. Быканов олоҕор, общественнай үлэтигэр сыһыаннаах блиц-ыйытыктарга хоруйдаатылар, айар талааннарын көрдөрдүлэр, эр киһи уонна уол оҕо сыһыаннарын тула сэһэргэһиигэ санааларын сайа эттилэр.
Сунтаар улууһуттан Н.М.Родионова аатынан оҕо дьоҕурун сайыннарар киин педагога Руслан Рудольфович Иванов олус ситиһиилээхтик кыттан «Креативность, интеллект, талант» номинация хаһаайына буолла, Үөрэх уонна наука министерствотын Бочуотунай грамотатынан наҕараадаланна. Онтон абсолютнай кыайыылааҕынан Бүлүүтээҕи 3№-дээх оскуола театральнай ускуустуба учуутала Василий Иннокентьевич Николаев ааттанна.
Анал номинация кыайыылааҕа Руслан Рудольфович Иванов күрэс туһунан санаатын маннык үллэстэр.
-Бүлүүтээҕи педколледжка информатика учууталыгар үөрэнэн, педагогическай практикабын аан бастаан барбыт Бүлүүтээҕи 3-дээх орто оскуолаҕа тиийэн эр киһи учууталлар күрэстэригэр кыттан бэйэбин тургутан көрдүм. Техническэй хайысхаттан аҕыйах кыттааччы баарын физкультура учууталлара элбэхтэрин бэлиэтии көрдүм. Уус-Майаттан кэлбит Семен Геннадьевичтыын уһуйааччы уонна аҕа сүбэһит быһыытынан Юнармия туһунан маастар-кылаас ыыттыбыт. Уопут атастаһан, олус үчүгэй тэрээһиҥҥэ кыттан, элбэх билэр дьоммун, учууталларбын көрсөн инники үлэбэр саҥа былааннардаах кэллим.
Айна Яковлева.
