Үгэскэ кубулуйбут үөрэх үлэһиттэрин спартакиадата

Муус устар 15 күнүгэр Бүлүү куоракка Педагог уонна Аҕа сүбэһит сылын чэрчитинэн үгэскэ кубулуйбут 31-с төгүлүн ыытыллар Бүлүү сүнньүн улуустарын үөрэх үлэһиттэрин спартакиадата буолан ааста. Тэрийээччилэр үөрэх салалталара уонна үлэһиттэрин профсоюһа. Спартакиада сүрүн сыала-соруга үөрэх ситимин үлэһиттэрин чөл олоххо өрө тардыы, спортка уһуйуу, Социалистическай Үлэ Дьоруойа П. Х. Староватов, Сэбиэскэй Сойуус Дьоруойдара Н.С. Степанова, Н.А. Кондакова, А.И. Миронова сырдык ааттарын үйэтитии буолар.

Сунтаар улууһуттан уопсайа 37 кыттааччы буолан баран спорт сэттэ көрүҥэр күрэхтэһэн II-с бочуоттаах миэстэни ылан үөрдүлэр-көттүлэр. Ол курдук, дуомакка 1-с, саахымакка 3-с, остуол тенниһигэр 3-с, винтовканан ытыыга 3-с, волейболга эр дьоҥҥо 1-ы, дьахталларга 2-с, хаамыскаҕа уонна хабылыкка 3-с, о5унан ытыыга 2-с. Улууспут бэтэрээн педагогтара уонна үөрэх үлэһиттэрэ Михаил Кириллин, Николай Егоров, Таисия Ксенофонтова, Владимир Спиридонов, Борис Николаев, Юрий Уаров ситиһиилээхтик кытыннылар. Уопсай түмүккэ Сунтаар үөрэҕин үлэһиттэрэ 2-с миэстэҕэ тахсан кубогынан, мэтээллэринэн, грамотанан наҕараадаланнылар.

Бу курэхтэһиигэ биһиги улууспут түмсүүлээхтэрин, ханнык да спорт көруҥэр өрүү инники күөҥҥэ сылдьалларын көрдөрдүлэр. 31-с төгүлүн ыытыллар спартакиада түмүктэнэн хамаандабыт маннык үтүө түмүктэрдээх төнүннэ. Бары кыттыбыт үлэһиттэрбитигэр махталбытын биллэрэбит, таһаарыылаах үлэни, ситиһиилэри баҕарабыт!

Добавить комментарий