2024 с. муус устар 2-5 күннэригэр Дьокуускай куоракка Бүтүн Россиятааҕы «Директор года – 2024» региональнай этаба буолан ааста. Быйыл куоҥкурус формата ураты буолла: дириэктэри сэргэ икки кини солбуйааччылара кыттыыны ыллылар. Куонкуруска үөрэх сокуоннарын, нормативтарын билиилэригэр тестирование ыытылынна, бэйэлэрин арыйдылар, уопут үллэһиннилэр, «Директор года» күрэс кыайыылаахтарын маастар-кылаастарыгар сырыттылар.
Куоҥкурус 5 түһүмэхтэн турда. Ол курдук: 1. «Профессиональный уровень» 2. Маастар-кылаастар 3. «Формула успеха» 4. «стратегическое решение». Бырайыак оҥоруу. 5. Пресс-конференция. Куоҥкуруска республика 19 оройуонуттан 27 хамаанда кытынна. Хамаандаҕа 3 киһилээх — дириэктэр, дириэктэри үөрэтэр-методическай үлэҕэ солбуйааччы уонна иитэр үлэҕэ солбуйааччы.
Сунтаар улууһун чиэһин быйыл Любовь Евсеева, Сунтаар гимназиятын дириэктэрэ ситиһиилээхтик көмүскээтэ. Кини баай уопутун, наставник быһыытынан үлэтин, салайар дьоҕурун, өйүн-санаатын дьүүллүүр сүбэ үрдүктүк сыаналаата. Бастакы уонна иккис туур түмүгүнэн Любовь Егоровна бастыҥ 10 иһигэр киирэн «Директор года – 2024» күрэс лауреат дипломунан уонна түөскэ кэтиллэр «Педагог-наставник РС (Я)» бэлиэнэн наҕараадаланна. Ону таһынан, дириэктэр советнига Петрова Марина Леонидовна, иитэр-үөрэтэр үлэҕэ солбуйааччы Шарина Саргылана Сергеевна састааптаах хамаанда «Бастыҥ салайар хамаанда» дипломунан наҕараадаланнылар.
Күрэххэ кыттыбыт Сунтаар гимназиятын хамаандатыгар, Любовь Егоровнаҕа махтанабыт, олоххутугар үөрүүнү, дьолу, ситиһиини баҕарабыт!
