2022 сылы Саха Өрөспүүбүлүкэтин үөрэххэ уонна наукаҕа миниистирэ Ирина Павловна Любимова үөрэҕирии хайысхатыгар Ааҕыы сылынан биллэрбитэ. Бу сыл чэрчитинэн Ааҕыы түһүлгэтин Чорооно тэрээһин Сунтаар улууһун бары нэһилиэктэринэн сылдьан түмүктүүр түһүмэҕэр -Сунтаар нэһилиэгин үөрэҕин тэрилтэлэринэн эстафетата салҕанар. Ахсынньы 8 күнүгэр Сунтаар технологическай колледжыгар Ааҕыы түһүлгэтин Чороонун Сунтаар политехническай лицейиттэн Сардаана Константиновна Никитина, директоры үөрэх чааһыгар солбуйааччы, Антонина Семеновна Гуляева, лицей библиотекатын сэбиэдиссэйэ уонна лицеистар делегациялара кэлэн үөрүүлээх быһыыга-майгыга туттардылар. Колледж директоры үөрэтэр-иитэр үлэҕэ солбуйааччыта Марфа Аркадьевна Семенова Ааҕыы сылын чэрчитинэн киэн туттар биир дойдулаахпыт, саха народнай поэта Л.А.Поповка аналлаах Ааҕыы түһүлгэтин Чорооно тэрээһин улахан суолталааҕын бэлиэтээтэ. Студеннар уонна колледж үлэһиттэрэ Л.А.Попов хоһооннорун аахтылар. Ааҕыы түһүлгэтин Чорооно улуус бары нэһилиэктэрин үөрэҕин тэрилтэлэринэн сылдьан ааҕыы кэрэ абылаҥар үгүс дьону уһуйан саха, нуучча уонна омук литератураларын кытары билиһиннэрдэ, алтыһыннарда. Ааҕыы алыптаах дойдута үүнэр көлүөнэни үтүөҕэ, сырдыкка, кэрэҕэ, билиигэ уонна ааҕыыга угуйа, уһуйа турдун.
