2022с олунньу 21 күнүттэн, Леонид Попов аатынан Арыылаах орто оскуолатын үлэһиттэрин көҕүлээһининэн, «Ааҕыы түһүлгэтин Чорооно» айан эстафетата саҕаламмыта. Чорооммут алгыһынан арыалланан, аартыктары арыйан айаннаан, Сунтаар улууһун бары нэһилиэктэрин кэрийэн, бүгүн, ахсынньы 9 күнүгэр, гимназиябытыгар тиийэн кэллэ. Чороону Сунтаардааҕы технологическай колледж дэлэгээссийэтэ үөрүүлээх быһыыга-майгыга кэлэн туттарда. Күндү ыалдьыттарбытын сахалыы сиэринэн дорҕоонноох тойугунан, уохтаах кымыһынан, алгыстаах алаадьынан айах тутан көрүстүбүт. Дэлэгээссийэ салайааччыта, дириэктэри үөрэх чааһыгар солбуйааччы, Павлова Александра Семеновна, кэлбит соругун толорон, «Ааҕыы түһүлгэтин Чороонун» Любовь Егоровнаҕа эҕэрдэ тылын этэн туран, итиэннэ колледжтар ааттарыттан Арыылаах орто оскуолатыгар анаан илдьэ кэлбит бэлэҕин туттарда. Ол кэннэ колледж үлэһиттэрэ, студеннар хоһоон кэһиилээх кэлбиттэрин ааҕан иһитиннэрдилэр. Харда тылыгар гимназиябыт дириэктэрэ, Любовь Егоровна, сонун сүүрээҥҥэ, ааҕыыны көҕүлүүр түһүлгэҕэ үөрэ-көтө кыттыһарын биллэрдэ уонна кэлэр 2023 сыл улууспутугар «Төрөөбүт тыл Сыла» биллэриллибитин биһириирин иһитиннэрдэ. Кэлбит ыалдьыттарга анаан гимназия үөрэнээччилэрэ хоһоон этэн, ырыа ыллаан, үнкүүлээн көрдөрдүлэр. Түһүлгэбит үөрүүлээх чааһын биир дойдулаахпыт Леонид Попов тылларыгар, Иван Иванов мелодиятыгар «Сунтаар миигин ыҥырар» диэн ырыатынан түмүктээтибит. Аны кэлэр нэдиэлэҕэ «Ааҕыы түһүлгэтин Чорооно» «Туллукчаан» оҕо уһуйааныгар айанныаҕа.
