Олунньу ый 8 күнүгэр С. А. Зверев — Кыыл Уолун аатынан улуустааҕы норуот айымньытын киинигэр, Сунтаар улууһун үөрэҕин үлэһиттэрин Олунньутааҕы сүбэ мунньаҕын үөрүүлээх арыллыыта буолла. Мунньах быйыл Арассыыйаҕа Педагог уонна Аҕа сүбэһит сылыгар ананан Олунньу 8-10 күннэригэр ыытыллыаҕа. Тэрээһиҥҥэ «Сунтаар уһулуччулаах учууталларын үйэлээх суоллара» быыстапкаттан саҕалаан, үөрэх эйгэтин сайыннарыытыгар тиийэ кэпсэтиэхтэрэ.
Сунтаар улууһун А5а баһылыга Анатолий Григорьев үөрэх салаатын үлэһиттэрин мунньах арыллыытынан эҕэрдэлээн туран саҥа са5ахтары арыйар кэм кэлбитинэн, үлэни өссө күүскэ сайыннарыахха, торумнаан үлэлиэххэ, инники көлүөнэ конкурентоспособнай буоларын ситиһиэххэ, республиканы салайар дьон гына иитэн таһаарыахха, республиканскай национальнай бырайыактарга киирэн туруулаһан үлэлиэххэ наада диэн бэйэтин ыллыктаах санаатын тириэртэ.
Үөрэх салаатын начальнига Альберт Иванов инники соруктарга туһаайыллыбыт этиилэрин, сүрүннээн бу сылга улахан тэрээһиннэр былааннаналларын кэпсээтэ, итиэннэ педагог үрдүк аатын ессе урдук чыпчаалларга таһаарар наадалааҕын бэлиэтээн туран эҕэрдэтин эттэ. Саха Өреспүүбүлүкэтин үөрэх уонна наука миниистирэ Ирина Павловна Любимова «Педагог уонна Аҕа сүбэһит» сыла сөптөөхтүк сыаналаныахтааҕын, учуутал идэтигэр эдэрдэри тардыы, педколледжтары кытта үлэ барыахтаа5ын, айымньылаах улэни, доруобуйаны ба5аран туран бэйэтин видео эҕэрдэтигэр туһулаата. Ону кытары истиҥ эҕэрдэтин ыытта Сунтаар А.П.Павлов аатынан Сунтаар 1№ оскуолатын 2000 сыллаа5ы выпускнига Петрова Светлана Алексеевна.
Альберт Иванов улууспут үөрэҕин 21 педагогическай династия бэрэстэбиитэллэригэр ону сэргэ эдэр көлүөнэни сүбэһит уһуйааччыларыгар махтал сурук уонна сыл бэлиэтин туттартаата.
Мунньах биир үөрүүлээх түгэнинэн Саха Өрөспүүбүлүкэтин норуодунай учууталын Олег Константинович Сосины чиэстээһин буолла. Олег Константинович эдэр көлүөнэни олоххо бэлэмнээх дьон гына иитэн таһааран үлэһит дьон оҥортуур үтүө үлэһит буолар. Олег Константинович Сосиҥҥа баьылык Анатолий Григорьев Сунтаар дьонун-сэргэтин аатыттан улахан махталын этэн туран убаһаҕа сертификат, Альберт Иванов саха быһаҕын туттардылар.
Итиэннэ Сунтаар улууһун үөрэҕин сайдыытыгар тус кылааттарын, өр сыллаах үрдүк таһаарыылаах үлэлэрин иһин ытык дьоммут наҕараада туттулар.
